Бүгін Алматыда 5 балдық жер сілкінісі болды.
ERNUR.KZ. Алматылықтар такси бағасы қатты көтеріліп кеткенін жеткізді. Алматы тұрғыны Назира жұмыс орнынан үйіне дейін таксимен 5 мың теңгеге жеткенін тілге тиек етті, деп жазады inform.kz.
Айтуынша, жұмыс орны үйінен айтарлықтай алыс емес. 5-6 көше ғана. Әдетте такси 700 теңге алады.
«Жер сілкінген кезде жұмыста едім. Үйде түстен кейін оқитын балам жалғыз қалған. Бірден баламды ойлап, тіпті жылап та жібердім. Сосын дереу жетейін деп таксиді көшеге шығып ұстадым. Бағасын сұрамастан дереу отыра қалдым. Үйге жетіп қалғанда жүргізушісі сізден 5 мың теңге деді. Оған да мән бермей төлей салып балама жүгірдім. Енді, Сіз сұрағанан кейін есіме түсіп отыр. Бағасын шарықтатып жіберіпті. Адамдар не боп барады?», - дейді қала тұрғыны.
Еске салайық, бүгін Алматыда 5 балдық жер сілкінісі болды.
Алматы әкімдігі барлық жиналу пунктілері ашық екенін мәлімдеді.
Алматы полициясы күшейтілген режимге ауысты.
