Салдарынан 43 жастағы анасы мен 16 жастағы қызы оқиға орнында көз жұмды.
Шымкентте анасы мен қызын көлік қағып кетті, деп хабарлайды ERNUR.KZ polisia.kz-ке сілтеме жасап.
Аталған оқиға 10 қазан күні таңғы сағат 9:30 шамасында Шымкент қаласы Төлеметов көшесі бойында болған.
"Mitsubishi Pajero автокөлігінің 24 жастағы жүргізушісі екі жаяу жүргіншіні қағып, жол-көлік апатын жасады. Салдарынан 43 жастағы анасы мен 16 жастағы қызы оқиға орнында көз жұмды", - делінген хабарламада.
Жайтты полицейлер СТТБТ-де ҚР ҚК 345-бабының 4-бөлігімен “Көлiк құралын басқаратын адамның жол жүрісі немесе көлiк құралдарын пайдалану қағидаларын абайсызда екi немесе одан да көп адамның өлiмiне әкеп соққан бұзуы” тіркеді.
Іс бойынша тиісті сараптамалар тағайындалды. Жүргізуші уақытша ұстау изоляторына қамалды. Сотқа дейінгі тергеп-тексеру амалдары жүргізіліп жатыр.
