«Шымкент қаласында жер, әлеуметтік көмек, баспана мәселесін шешу өзекті».
Шымкент қаласы Қоғамдық кеңесінің кезекті отырысына ҚР Парламенті Сенатының депутаттары Нұрлан Бекназаров пен Айгүл Қапбарова қатысты, деп хабарлайды ERNUR.KZ.
Үшінші мегаполиске жұмыс сапарымен келген сенаторлар кеңес мүшелерімен пікір алмасып, қоғамдық институттың жұмысын жетілдіру, мемлекеттік бағдарламалардың орындалуын бақылау мәселелері бойынша ой бөлісті.
Жиында Қоғамдық кеңес 3 жылдан бері табысты жұмыс істеп келе жатқанын атап өткен Нұрлан Құдиярұлы әлі де жұмысты жетілдіре түсу қажеттігіне тоқталып:
«Өзіміз сайланған өңірдің тыныс-тіршілігімен танысуымыз керек. Жүргізіліп отырған жұмыстар, өзекті мәселелерден хабардар болып отыруымыз керек. Президент тапсырмасына сәйкес және Үкімет тарапынан Алматы, Нұр-Сұлтан, Шымкент қалаларының дамуына көп көңіл бөлінуде. Ал, қоғамдық кеңес институты билік пен қоғам арасында алтын көпір болуы тиіс. Қоғамдық кеңестің функцияларын жетілдіру бойынша ұсыныстарыңызды айтыңыздар. Қоғамдық кеңес әрі қарай да қаланың әлеуметтік-экономикалық дамуына үлес қоса береді деп сенемін», – деді.
Ал Айгүл Жарылқасынқызы өңірдегі әлеуметтік қолдау шаралары жайлы сөз қозғап:
«Қоғамдық кеңестің ықпалы мен рөлі жыл сайын күшейіп келеді. Елімізде әлеуметтік реформалар жүргізілуде, жаңа әлеуметтік көзқарас қажеттігі туындап отыр. Осы мәселеде сіздерге артылатын жүк көп деп ойлаймын. Шымкент қаласында демографиялық өсім жоғары. Әлеуметтік мәселесі қыз-қыз қайнап тұратын өңір. Шымкент қаласында жер, әлеуметтік көмек, баспана мәселесін шешу өзекті. Болашақта өздеріңізбен осы мәселелерді шешу бағытында тығыз жұмыс істейміз», – деді.
Сондай-ақ, жиында кеңес мүшелері де өз ойларын айтып, ұсыныстарын жеткізді.
