Ата-аналарға мектеп формасын сатып алудың қажеті жоқ.
Фото: Серік Қосай
Шымкент қаласының жалпы білім беретін мектептерінде барлық сыныптардың оқушылары үшін сыныптардағы бала санын 25 адамнан асырмай, аралас форматта оқытылатын болады, деп хабарлайды ERNUR.KZ.
Бүгін 2020-2021 оқу жылының IV тоқсанында оқу процесін ұйымдастыру туралы өткен брифинг барысында қалалық Білім басқармасының басшысы Жанат Тажиева оқу жылының соңғы тоқсаны қалай оқытылатынын түсіндірді.
– Контингенті 300 оқушыға дейінгі мектептерде сыныптардағы балалар санын 25 адамнан асырмай дәстүрлі форматта оқытуға, білім беру ұйымы әкімшілігінің шешімі бойынша сабақтан тыс уақытта 15 адамнан аспайтын топтарда оқушыларды жеке оқытуға болады, - деді Жанат Арысбекқызы.
Оқушыларға мектепке міндетті мектеп формасында емес, еркін және жинақы киімде болуға рұқсат етіледі. Ата-аналарға мектеп формасын сатып алудың қажеті жоқ.
– Онлайн оқудың жалпы білім сапасына кері әсері болған соң IV тоқсанды білім беру ұйымында жалғастырып отырмыз. Бұл тоқсандағы негізгі мақсат – жалпы пәндерді қайталау, жіберілген олқылықтарды толтыру, қосымша сабақтар арқылы білімін жетілдіру. Ол үшін маусым айында тағы бір ай қосымша үйірме сабақтарын ұйымдастыру туралы ұсынымызды Білім және ғылым министрлігіне жолдадық, - дейді Ж.Тәжиева.
Айта кетейік, бүгінгі таңда Шымкент қаласындағы 186 мектепте 226 679 оқушы білім алуда. 136 жалпы білім беретін мектеп, 6 дарынды балаларға арналған мектеп (Дарын №1, Дарын №2, БИЛ №1, БИЛ №2, №8, №90), 4 кешкі мектеп, 5 арнайы мектеп-интернат, 35 жекеменшік мектеп бар. Сол 136 мектептің 14-інен вирус анықталып, екі апталық карантинге жабылды.
