Суретші Серікбай Құлышұлы оқушыларға өзінің сурет салу әдістерімен бөлісті.
Шымкент қаласының Еңбекші ауданына қарасты Ы.Алтынсарин атындағы №65 мектеп-гимназиясында ҚР Суретшілер Одағының мүшесі Жорабеков Серікбай Құлышұлымен шығармашылық кездесу өтті, деп хабарлайды ERNUR.KZ.
Шығармашылық кездесудің мақсаты - жас буынның өз бойларындағы жасырынып жатқан шығармашылық қабілеттерін ашу және шыңдау.
Суретші Серікбай Құлышұлы оқушыларға өзінің сурет салу әдістерімен бөлісіп, суретшіге тән қасиеттерді, қарапайым қарындашты ұстаудың өзіндік әдісін және де су бояудың өзінен мағыналы сурет шығарудың қыр-сырын түсіндірді.
Сонымен қатар, өзінің басынан өткен қызықты хикаяларымен бөлісіп, жастарға мотивациялық күш болар ақыл-кеңестерін жеткізді.
Оқушылар суретшінің өзімен бірге алып келген өнер туындыларын тамашалап, өз әсерлерімен бөлісті.
