ТҮРКІСТАН: Кентау шахталарындағы жер асты суы қалаға қауіп төндіріп жатыр

0
833

Бұлай жалғаса беретін болса, апатты жағдай туындауы мүмкін.


ТҮРКІСТАН: Кентау шахталарындағы жер асты суы қалаға қауіп төндіріп жатыр

Түркістан облысы мен Түркістан қаласын ағын сумен қамту бағытында тағы бір жоба қолға алынды, деп хабарлайды ERNUR.KZ.


Облыс әкімі Өмірзақ Шөкеев аталған жобаны жүзеге асыру барысын қадағалау үшін Кентау қаласында жұмыс сапарымен болды. Соңғы кездері Кентау қаласындағы шахталарда жер асты суы көтеріліп, қалаға аздап қауіп төндіріп жатыр. Соның әсерінен қаланың кейбір аймақтарының жері төмен түсіп, ойық жерлер пайда болуда. Бұлай жалғаса беретін болса, апатты жағдай туындауы мүмкін.


Сол қауіптің алдын алу және ол су көздерін Түркістан мен Кентауды көгалдандыруға пайдалану мақсатында облыс әкімі Ө.Шөкеевтің тапсырмасымен тың жоба қолға алынғалы отыр. Жоба бойынша бұрынғы шахтаға түсетін ғимараттың ішіне 4 сусорғыш орнатылып, Кентаудағы саябақта орналасқан бетонды арыққа құю арқылы қала ішімен арықтарға су жүргізу көзделген. Жоба жүзеге асқан жағдайда Кентау көшелерінен де су ағып өтетін болады. Нәтижесінде Кентау жасыл желегін сақтайды, әрі тұрғындарға жайлы орта қалыптасады.


Сонымен бірге, артық суды «Қосқорған» су қоймасына жіберіп, одан әрі толықтыра түсу жоспарланған. Кентаудағы «Мірғалымсай» кен орнында шахталық сутөкпе мен дренаждар салынады. Қондырғылар 115-130 метр тереңдікке дейін орнатылмақ. Жобаның бірінші кезеңі сараптамашылардың оң бағасын алған. Жақында жүзеге асады деген жоспар бар.


Өмірзақ Шөкеев бұл жобаның маңыздылығына тоқталып, Кентау қаласының әкіміне және құрылысқа жауапты басшыларға тапсырмалар берді.