ТҮРКІСТАН: ​Түлкібастық 107 жас кәсіпкер қайтарымсыз грантты алуға үмітті

0
108

Аудан жастары «Жас кәсіпкер» оқу курстарын аяқтап отыр.


ТҮРКІСТАН: ​Түлкібастық 107 жас кәсіпкер қайтарымсыз грантты алуға үмітті

Түлкібас ауданының орталығындағы «Жеті қазына» аллеясында «Жас кәсіпкер» оқу курстарын аяқтаған жастарымызға сертификаттар табысталды, деп хабарлайды ERNUR.KZ.

Салтанатты шараның ашылу салтанатында алғы сөз алған аудан әкімінің орынбасары Е.Күзембаев,

"Елбасымыз Н.Ә. Назарбаев 2018 жылғы 5 қазандағы Жолдауында 2019 жылды – Жастар жылы деп жариялаған болатын. Тұңғыш Президентіміз жастардың бүгіні мен болашағына қамқорлық жасауды өз саясатының негізгі мәні деп санайды. Өйткені жастар қоғамның бір бөлігі ретінде мемлекетте маңызды рөл атқарады", -деп, бүгінгі өз жеке кәсібін ашуға үлкен қадам жасағалы тұрған аудан жастарына сәттілік тілеп, оқу сертификаттарын тапсырды.

Шара барысында жас кәсіпкерлердің өз қолымен дайындаған бұйымдары мен тағамдарының көрмесі ұйымдастырылып, аудандық мәдениет үйінің өнерпаздары тарапынан дайындалған концерттік бағдарламамен жалғасты.

Бүгінгі таңда ауданымызда 107 жас «Жас кәсіпкер» оқу курстарын аяқтап, өз жеке кәсібін ашуға мемлекет тарапынан берілетін 505 мың теңге қайтарымсыз грантқа қатысуға үміткер атанып отыр.

Сондай-ақ, ауданымызда еліміздің болашағы жастар үшін сапалы білім алып, спортпен шұғылдануға барлық жағдайлар жасалынған.

Мәселен, биылғы жылы Азаттық елді мекенінен 600 орындық жаңа мектеп білім күніне пайдалануға берілсе, Пушкин, Бреусов, Шевцов, Кошевой, Жамбыл, Сеславино, Алтынсарин мектептеріне күрделі жөндеу мен қосымша корпус құрылыстары жүруде. Және Састөбе кентінен 240 жас бір мезетте спорттың алуан түрімен шұғылдануға бағытталған спорт кешені ашылса, аудан орталығындағы спорт мектебі жаңынан жаңа күрес залы мен «Жанкент» мөлтек ауданынан су жаңа кіші футбол алаңы, «Стрит воркаут» және балаларға арналған ойын алаңшалары аудан жастарының игілігіне пайдалануға берілмек.

«Біз сендердің білікті маман, болашағы жарқын отаншыл азамат болып өсулерің үшін барлығын жасап келеміз» - деген, Елбасымыздың еліміздің жастарына айтқан нақыл сөзі, Түлкібас ауданында атқарылып жатқан жұмыстармен іспеттес.


Айтар жаңалығыңыз, бөлісер оқиғаңыз болса, +77752327733 whatsapp нөміріне жіберіңіз

Пікір қалдыруыңыз үшін сайтқа кіруіңіз қажет