2019 жылы 6 ай бойы 190 елді мекенді (темір жол стансасын) қамтып, кемінде 89 мың адамды медициналық көмекпен қамтамасыз ету жоспарланған.
ERNUR.KZ. Ағымдағы жылы «Денсаулық» және «Саламатты Қазақстан» медициналық пойыздары шалғайдағы 220 елді мекен тұрғындарына қызмет көрсетеді. Бұл жайында Мәжіліс депутаттарының ресми сауалына жауап берген ҚР Премьер-Министрі Асқар Мамин атап өткен, деп жазады ҚазАқпарат.
«Ағымдағы жылы 2 медициналық пойызды («Денсаулық» және «Саламатты Қазақстан» пойыздар) шығару жоспарланған. Медициналық пойыздар төмендегідей қызметтер көрсетеді: бейінді мамандардың (офтальмолог, отоларинголог, невролог, хирург, акушер-гинеколог, кардиолог, стоматолог, терапевт, маммолог, педиатр және т.б.) қабылдауы және кеңесі», - деп атап өтеді Үкімет басшысы.
Асқар Маминнің жазуынша, медициналық пойыздардың шамамен 220 елді мекенге (темір жол стансаларына) қызмет көрсетуіне қажеттілік бар.
«Мәселен, 2018 жылы медициналық пойыздар 4 ай бойы жұмыс істеді және медициналық көмекпен 127 елді мекен (темір жол стансасы) қамтамасыз етіліп, 38 604 адам тексеруден өтті. 2019 жылы 6 ай бойы 190 елді мекенді (темір жол стансасын) қамтып, кемінде 89 мың адамды медициналық көмекпен қамтамасыз ету жоспарланған», - деді Премьер-Министр.
