Журналистер министрден тергеу нәтижелері қашан белгілі болатынын, қалың бұқара екі баланың неден көз жұмғанын қашан біле алатынын сұрады.
ERNUR.KZ. Денсаулық сақтау министрі Ажар Ғиният 29 қарашада Орталық коммуникациялар қызметінде өткен брифингіде Қарағанды облысындағы балаларға арналған арнайы әлеуметтік қызмет көрсету орталығында болған жаппай улану жағдайына қатысты түсініктеме берді, деп жазады zakon.kz.
Журналистер министрден тергеу нәтижелері қашан белгілі болатынын, қалың бұқара екі баланың неден көз жұмғанын қашан біле алатынын сұрады.
"Құқық қорғау органдары бұл іспен айналысып жатыр, бізге ресми түрде әлі жауап берілген жоқ. Біз бұл жағдайда өз диагнозымызды жарияладық: Улы заттан улану. Одан кейін Әділет министрлігіне қарасты зертхана сот-медициналық сараптама жүргізді. Балалардың (зардап шеккендер - ред.) сауыққандығын біліп отырмын, біз оларды қайтардық (орталыққа - шамамен), олар оңалту шараларын қабылдады", - деді Ажар Ғиният.
Министр медициналық ұйымның зертханасы балалар қабылдаған дәрі-дәрмектерді, яғни диагноз бойынша психотроптық препараттарды ғана анықтағанын айтты.
"Сот медициналық сараптама мүмкіндіктері әлдеқайда жақсырақ екенін ескере отырып, балалар ауруханада болған кезде алынған барлық биологиялық материалдар соларға тапсырылды. Нәтижелері әлі белгісіз", - деп сөзін түйіндеді Денсаулық сақтау министрлігінің басшысы.
30 шілдеде Қарағанды облысының балаларға арналған әлеуметтік қызмет көрсету орталығында жаппай улану фактісі орын алды. Алдымен екі бала өзін нашар сезінді, содан кейін тағы 10 баланың жағдайы күрт нашарлады. Зардап шеккендер ауруханаға жатқызылды. Дәрігерлер қанша күш салғанымен, бір бала көз жұмды.
Жаппай улану фактісі бойынша қылмыстық іс қозғалды.
28 тамызда тағы бір баланың жан тапсырғаны белгілі болды.
