«Кез келген нәрсеге әншілерді қосып, ғайбаттаудың қажеті жоқ»
«Музарт» тобының әншісі Сәкен Майғазиев «су тасқыны кезінде үнсіз қалды» деп өнер адамдарын айыптаған халыққа өз уәжін айтты.
«Су алып жатқан жерлердің баршасына шамамыздың келгенінше біз де үлесімізді қосып жатырмыз. «Қарға өшін тырнадан алыпты» демекші, кез келген нәрсеге әншілерді, өнер адамдарын қосып, ғайбаттаудың қажеті жоқ. Біз де осы қоғамның бір мүшесіміз, азаматымыз. Әріптесіміз Сержан Молдасанұлы айтпақшы, әншілерден артық ұйымшыл ұжым жоқ. Арыстағы жағдай болсын, Мақтааралды су басқанда да, басқа да жағдайларда басы-қасынан табылдық. Өте ұйымшылмыз, бір-біріміздің сөзімізді сөйлеп, сойылымызды соғуға дайынбыз.
Енді, мына жағдайда әскер жұмылдырылып жатыр, Президентіміздің өзі Жолдау жасап жатыр. Осының бәріне құлақ асып, тыңдап, түсінейік. Ең бастысы, адам шығыны болмаса екен деп тілейміз. Қаншама қайырымдылық қорлары жұмыс істеп жатыр. Көмек көрсетіліп жатыр. Осы сәтті пайдаланып, жеке алаяқтықпен айналысып жатқан адамдар да өте көп», - деді өнер иесі.
Ол сондай-ақ керек болса су тасқыны болған жерге барып, көмектесуге дайын екенін жеткізді.
«Жүрегімізбен, жанымызбен сіздермен біргеміз. «Қасымызда болыңдар» десеңіздер, баруға дайынбыз. Әншілер шамасы келгенше қаржылай қолдау көрсетіп жатыр. Жағдайы барлар миллион теңгеден, жағдайы жоқтар кем дегенде 100 мыңнан аударды. Айту керек болса, осыны да айтайық. Дұрысынан түсініңіздер. «Болмайтын адам өнбейтін істі даулайды» деген сөз бар, болмайтын сөзді айта бермейік. Бәріңізді құшақтадым», - деді Сәкен Майғазиев.
