ТҮРКІСТАН: Зейнетақы таратуға шыққан екі инкассатордың мәйіттері табылды

0
4 697

Қызметтік көліктің ішінде зейнетақы мен жәрдемақыны төлеуге арналған 7,5 миллион теңгеден астам қаржы болған.


ТҮРКІСТАН: Зейнетақы таратуға шыққан екі инкассатордың мәйіттері табылды

Түркістан облысы Арыс ауданында инкассаторлардың көлігіне шабуыл жасалды. Бұл мәліметті полицейлер ресми мәлімдеді, деп хабарлайды ERNUR.KZ тілшісі.

Оқиға 7 маусым күні болған. Инкасаторлар Арыс ауданындағы бірнеше елдімекен тұрғындарының зейнетақысын тарату үшін жолға шыққан. Сол күні кешкі сағат 18:15 шамасында Арыс АПБ-нің кезекшілік бөлімшесіне пошта бөлімінен Арыс ауданына қарасты ауылдардың біріне қаржыларды жеткізу үшін шығып кетіп, байланысқа түспей жатқан екі инкассатор туралы хабарлама келіп түседі. Қызметтік көліктің ішінде зейнетақы мен жәрдемақыны төлеуге арналған 7,5 миллион теңгеден астам қаржы болған.

Оқиға орнына бірден Арыс АПБ-нің жедел-тергеу тобы жетеді. Анықталғандай, инкассаторлар белгіленген бағыт бойынша ауылдардың біріне кетіп, алайда белгісіз себептерге сәйкес байланысқа шықпай қалған. Полицейлер олардың мекен-жайын анықтау мақсатында, сонымен бірге ауданнан барлық шығар жерлерді, аймақтарды, көшелер мен қиылыстарға қойылған бейнекамераларды тексеріп, куәгерлерден сұрақ-жауаптар алып, қажетті деген шараларды атқаруда.
Инкассаторларды іздеуге Түркістан облысы Полиция департаментінің Криминалды полиция басқармасының қызметкерлері мен Арыс АПБ-нің полицейлері жұмылдырылды. Нәтижесінде жедел уәкілдер Арыс қаласынан 5 шақырым жерден тастанды көлікті, ал аудан орталығынан 35 шақырым жерден оқ тиген жарақаттарымен инкассаторлардың мәйітін тапты.

Қазіргі таңда, аталған жайт ҚР Қылмыстық кодексінің екі бабымен, яғни 99-бабы «Адам өлтiру» және 192-бабы «Қарақшылық» бойынша тіркеуге алынды. Полицейлер ауыр қылмысты жасаған күдіктілердің тұлғасын анықтау мен оларды құрықтауға бағытталған кешенді жедел-іздестіру шараларын іске асыруда.