Кәсіпкер бұған дейін де 2 ИВЛ аппаратын алып берген.
Мақтааралдық жеке кәсіпкер ауруханаға 2 ивл аппаратын алып берді, - деп хабарлайды ERNUR.KZ.
Еліміздегі карантин жағдайына байланысты Түркістан облысы Мақтаарал ауданының кәсіпкерлері белсенділік танытып, ел үшін көптеген игі істерді атқарып жатыр. Бүгін жергілікті кәсіпкер, “Астана Строй-Проект” жауапкершілігі шектеулі серіктестігінің директоры Аташов Данияр Серікбайұлы аудандық "Мырзакент" ауруханасына 2 ИВЛ аппаратын сыйға тартты.
Оңтүстік Кореядан жеткізілген аппараттардың әрбірінің құны 700 мың теңгеден асады. Қазіргі таңда бұл медицинаға арналған аппараттар -пневмонияға шалдыққан науқастарды емдеуде таптырмайтын құрал саналады.
Аудан әкімінің орынбасары Бейсенбай Төребеков пен аудандық "Мырзакент" ауруханасының бас дәрігері Берік Есімханов аппараттарды ауруханаға жеткізіп берген кәсіпкердің ұлына алғыстарын білдіріп, осындай қиын кезеңде халқына сүйеніш бола білген азамат нағыз "бүгінгі күннің батыры" екенін атап өтті.
“Қазір ауруханамызға пневмония диагнозымен түсіп жатқан науқастар көп. Ауру асқынған жағдайда адамның өкпесіндегі тыныс алу жолдарын зақымдайды. Науқасқа оттегі жетіспей қиналады. Міне, осындай жағдайда ИВЛ аппараттарының маңызы зор" – дейді "Мырзакент" ауруханасының бас дәрігері Берік Нағашбекұлы.
Айта кетейік, кәсіпкер Данияр Аташов бұған дейін де "Мырзакент" ауруханасына жедел балаларға медициналық қызмет көрсетуге арналған 2 ИВЛ аппаратын алып берген болатын.
