ШЫМКЕНТ: Жаңа бизнес идеяны жүзеге асыратын мемлекеттік грантқа құжат қабылдау басталды

0
114

Шымкент қаласына 4500 грант бөлінген


ШЫМКЕНТ: Жаңа бизнес идеяны жүзеге асыратын мемлекеттік грантқа құжат қабылдау басталды

Бұл жоба нәтижелі жұмыспен қамтуды және жаппай кәсіпкерлікті дамытудың 2017-2021 жылдарға арналған «Еңбек» мемлекеттік бағдарламасы аясында жүзеге асып жатыр, деп хабарлайды ERNUR.KZ shymkala.kz порталына сілтеме жасап.

Жоба жайлы қалалық халықты жұмыспен қамту орталығының маманы Гүлбану Шанаева: «Бір реттік қайтарымсыз мемлекеттік грант конкурс арқылы үлестіріледі. Қазіргі таңда 18 бен 29 жас аралығындағы еңбекке жарамды жұмыссыз жүрген жастар мен мүмкіндігі шектеулі азаматтардан, сондай-ақ, әлеуметтік аз қамтылған және көп балалы отбасылардан құжаттарды қабылдауды бастадық», – деп мәлімдеді.

Атап айтсақ, жоғарғы санаттарға жататын азаматтардың конкурсқа қатысуы үшін арнайы мамандық немесе сертификаттары болуы шарт. Ол дегеніміз, халықты жұмыспен қамту орталығының 3 айлық кәсіптік оқуы немесе «Атамекен» кәсіпкерлік палатасының 25 күндік «Бизнес-бастау» курсының түлегі болуы тиіс.

Содан кейін, бұл азаматтар комиссия мүшелерінің алдында өз бизнес жоспарын қорғап, 200 АЕК (500 мың теңге) көлеміндегі грант иегері атанады. Қалаға бөлінген грант саны – 4500. Конкурс тамыз айында басталып, грант иегерлері жыл соңына дейін анықталады.

Ал, қалалық халықты жұмыспен қамту орталығы «Кәсіптік оқыту» бөлімінің басшысы Асылбек Наурызбаевтың мәліметіне сүйенсек, үш айлық курсты өткен жылы 1807 (675 жас) адам оқыған. Биыл 2035 адам қысқа мерзімді оқытудан өтіп, өз кәсібін ашуға ниет білдірген. Оның ішінде 930 жас маман бар. Бүгінде аталған бағдарлама арқылы кәсібін дөңгелетіп жүрген жастар тігін цехы мен шаштараз ашып үлгерген.


Айтар жаңалығыңыз, бөлісер оқиғаңыз болса, +77752327733 whatsapp нөміріне жіберіңіз

Пікір қалдыруыңыз үшін сайтқа кіруіңіз қажет