Пайдасы зор.
фото: shkolabuduschego.ru
Құрсақтағы шарананың жатысына мән беріп, ойланып көргенсіз бе? Ал ғалымдарды бұл қалып қызықтырып, зерттеулер жүргізген.
Бір топ ғалым бұны намаздағы сәждеге ұқсатып, одан ғылыми құпия іздесе, тағы бір тобы бұл қалыпта ағза физикалық және психологиялық тұрғыда жылдам қуаттанатынын анықтаған.
Йога тренерлері де бұл қалыпты әлсіреген, шаршаған денені тынықтыру және қуат-күшін қалпына келтіру үшін ұсынады.
Жалпы, «құрсақтағы сәби қалпы» йога ілімінде 1924 жылдан бері қолданылып келеді. Аталуы қазақтың «бала қалпы» деген атауға ұқсайды, «Баласана» деп аталады.
Орындалуы
1) Денені қысатын киімдерді шешіп, кең әрі ыңғайлы киім киіңіз.
2) Желдетілген, тыныш бөлмеде немесе табиғат аясында төсеніш үстіне отырыңыз. Табан жоғары қарап, ал аяқ саусақтары еденге тиіп тұруы керек.
3) Еңкейіп, маңдайыңызды төсенішке тигізіңіз. Содан соң кеудеңізді тізе үстіне қойып жатыңыз.
4) Қолдарыңызды екі жаққа еркін қойыңыз. Алақан жоғары қарап тұруы керек. Қол ұшы аяқ ұшына жақын әрі бос жатқаны дұрыс.
5) Денеңізді барынша босаңсытыңыз. Қолдарыңыз, басыңыз бар салмағымен еденге тартылып жатқандай сезініңіз.
6) Осы қалыпта жатып, 7-10 рет терең тыныс алыңыз. Мұрынмен тыныс алып, ауаны мұрынмен шығарыңыз.
7) Асықпай алдымен басыңызды көтеріңіз, сосын кеудеңізді көтеріп бастапқы қалыпқа оралыңыз.
Жаттығу аяқталды. Оны қайталаудың қажеті жоқ. Күніне бір рет сәби қалпында жатып, 7-10 рет тыныс алу жеткілікті. Ал егер қатты шаршасаңыз, бұл қалыпта 1-3 минут жатуға рұқсат етіледі.
Пайдасы
- физикалық және эмоциональды түрде бүкіл денені босаңсытады;
- дененің барлық буындарын созады;
- омыртқаның иілгіштігін арттырады;
- мойын мен иықтағы тұздардың ыдырауына ықпал етеді;
- бас ауруларының алдын алады;
- көзді демалдырады, қан айналымын жақсартады;
- арқаның құрысып ауыруын басады;
- негативті ойлардан сананы тазартады;
- жүйке жүйесін стрестен «босатады»;
- жүйкені тыныштандырады;
- қанның миға толық баруын қамтамасыз етеді;
- үрейді қуады, қорқынышты басады;
- асқазанға, ас қорыту мүшелеріне массаж жасалады;
- дұрыс тыныс алуға үйретеді;
- қарын мен сандағы май қабаттарының «еруін» жылдамдатады;
- зат алмасуды белсендіреді.
Қиындатпаңыз!
фото: 101yogastudio.com
Жалпы жаттығуды жеңіл орындаған дұрыс. Егер алғашқыда маңдайды еденге тигізу қиындық тудырса, аяқ сіңірі тартылып қалып жатса, басыңызға және бөксе мен аяқ арасына кішірек жастықша қойыңыз. Әсіресе, қан қысымы жоғары және қарт адамдарға йога тренерлер маңдайды жастыққа қоюды ұсынады. Жаттығу кезінде ұйықтап қалсаңыз ештеңе етпейді.
- Бойға қуат жинағыңыз келсе, шаршағанды басу үшін кез келген уақытта «сәби қалпында» 1 минут жатыңыз. Сонымен бірге спортпен шұғылданған соң оны осы баласана қалпымен аяқтаудың да пайдасы зор.
Ескерту!
Жүкті әйелдерге, тізесінде жарақаты (темір қойылған) бар адамдарға йоганың бұл түрін жасауға болмайды. Сонымен қатар тамаққа тойып алып (арада 2-3 сағаттан соң ғана орындаған жөн) жаттығуды жасау зиянды.
Дайындаған: Ж. Смағұлова,
Тағы да оқыңыз:
Үйде жаттығу жасағанда мына 10 қатеден аулақ болыңыз
Арықтау онлайн-марафондары: салмақ тастау ма әлде денсаулықты құрту ма??
