Ата-анасы ішімдікке салынған ол бала кезінде екі кішкентай қарындасын асырау үшін ерте еңбекке араласқан екен.
Фото: polisia.kz
ERNUR.KZ. Абай облысындағы түрмелердің бірінде жазасын өтеп жатқан ер адам өмірінде бірінші рет білім алмақ, деп жазады inbusiness.kz.
Polisia.kz сайтының мәліметінше, Абай облысындағы түрмелердің бірінде №2 жалпы білім беретін орта мектептің қолдауымен 21-53 жас аралығындағы адамдар сабақ оқи алады. Сол адамдардың арасында өмірінде бірінші рет сауатын ашып отырған 53 жастағы азамат ерекше көзге түскен екен.
"Балалық шағым жұмыс істеп, екі қарындасымды бағумен өтті. Әке-шешем көп ішетін, сондықтан, мені мектепке апарған да жоқ. Жастық шағым әртүрлі қамау мекемелерінде өтті. Осы жасқа келіп түсінгенім – егер білім алғанда тағдырым басқаша болар ма еді. Дегенмен, ештен кеш жақсы", – дейді сотталған азаматтың өзі.
Ал, қамау мекемесінің басшысы Жеңісбек Дәуренбеков білім – сотталғандар үшін түрмеден шыққаннан кейін жаңа мүмкіндік сыйлайтын құрал дейді.
