"Араққа тәуелдіні коньякпен емдеуге бола ма?": депутат министрден маңызды мәселені сұрады

Бүгін төменгі палатада денсаулық сақтау саласын дамыту мәселесі талқыланды. Сол кезде депутат Зайытов денсаулық сақтау министріне жұмбақтап сұрақ қойды.

"Ақмарал Шәріпбайқызы, араққа тәуелді адамды коньякпен емдеуге бола ма?", - деді Зайытов.

Денсаулық министрі депутаттың нашақорларды метадонмен емдеу туралы сұрап жатқанын бірден түсінді.

"Метадон туралы айтып отырсыз ғой. Ол науқас басқа есірткіні іздеп кетеді, артынан қылмыс жасайды. Біз соны алдын алу үшін жасап жатырмыз. Халықаралық тәжірибе де енгізілген. Сол жағынан қарау керек деп ойлаймын", - деді Әлназарова.

Зайытов бұл мәселені кеңінен талқылауды ұсынды. Себебі шағымданып жатқан мамандар аз емес. Ал денсаулық вице-министрі айтқанынан қайтпай отыр.

"Сіздің министрліктегі Дудник мырзаға бірдеңе дәлелдеу мүмкін емес. Ол кісі өз позициясын ұра береді екен. Нашаға тәуелді адамды екінші түрімен емдейміз деген әңгіме ақылқа қонбайтын нәрсе ғой", - деп атап көрсетті Зайытов.

Депутат министрлікте ресми сауалдарға жауап беретін "робот" қызметіне қатысты ескерту де жасады. "Бізге хат-хат халықтың өтініші келеді. Білмеймін, сіздерде робот бар ма? Тақырыбына қарап, жауабын жаза береді-ау деймін. Ішіндегісін оқымайды. Солай деп ойлаймын. Барлық хатқа дайын тұрған бір жауапты бере береді. Бір көмекшіңізді бекітіп қойыңыз, мен тікелей жіберіп отырмасам. Әйтпесе, "дежурный" жауаптарыңыздан шаршам кеттім", - деді Заитов.