Бас прокуратура қаңтар оқиғасы бойынша рақымшылыққа ілігетіндердің тізімін жасап жатыр

02.09.2022 10:35

415

Жаппай тәртіпсіздіктер кезінде қаза тапқандар саны өзгермеген.

ERNUR.KZ. Бас прокурордың орынбасары Әсет Шындалиев қаңтар оқиғасы бойынша президент жариялаған бір реттік рақымшылыққа кімдер ілікпейтінін айтты, деп жазады sputnik.kz.

"Әзірге нақты санын айта алмаймын. Өйткені қазір пысықтап жатырмыз. Президент тапсырма берді, енді қарастыру керек. Экстремистік қылмыс жасағандар, қаңтар оқиғасын ұйымдастырғандар рақымшылыққа ілікпейді", - деді Шындалиев мәжіліс кулуарында.

Айтуынша, мыңнан астам іс тергеліп, мыңға тарта адам сотталған.

"Осы статистиканы назарға алу керек. Әзірге қанша адамға амнистия жарияланатынын айтуға дайын емеспін. Экстремистердің жалпы саны есімде жоқ, өйткені іс өте көп", - деді бас прокурордың орынбасары.

Ол рақымшылыққа ілігетін адамдардың саны кейін хабарланатынын жеткізді.

"Біз тергеу кезінде де ізгілік таныттық. Естеріңізде болса, президент қаңтар оқиғасынан кейін жеңіл қылмысқа барғандарды бас бостандығынан айырмауды тапсырған еді. Қателеспесем, 983 адам сотталды, оның ішінде 100-ден астамы нақты жазаға кесілсе, қалғандары шартты түрде және бас бостандығы шектелді", - деді Шындалиев.

Ол жаппай тәртіпсіздіктер кезінде қаза тапқандар саны өзгермегенін атап өтті.