Батыс Қазақстан өңірінде екі республикалық маңызы бар күре жолдың құрылысы аяқталуға жақын

0
393

Нысандарда 370 техника мен 500 адам жұмыс істейді.


Батыс Қазақстан өңірінде екі республикалық маңызы бар күре жолдың құрылысы аяқталуға жақын

Жалпы ұзындығы 245 шақырымды құрайтын «Қазталов-Жәнібек-РФ шекарасы» (142 шақырым) мен «Өнеге-Бисен-Сайқын» (103 шақырым) күре жолдарында атқарылып жатқан күрделі жөндеу жұмыстары аяқталуға жақын. Бірінші жобада асфальт төсеу жұмыстары толығымен аяқталса, екінші күре жолдың 10 шақырымын ғана салу қалды, деп хабарлайды ERNUR.KZ ҚР Көлік министрлігіне сілтеме жасап.

«Қазталов-Жәнібек-РФ шекарасы» күре жолының 142 шақырымына жаңа асфальт төселді. Қазір күрделі жөндеу жұмыстарының соңғы сатысы жүзеге асып жатыр. Жолшылар жол қауіпсіздігін арттыру мақсатымен елді-мекендердің қасымен өтетін жол бөлігіне жарықтандыру орнатып, қажет жол белгілерін орнатып жатыр. Жол қолданушыларының ыңғайы үшін бес жаңа санитарлық гигиеналық торабы бар демалыс алаңдары да қарастырылды. Бұл жол облыс орталығын Казталов, Жәнібек және Бөкей ордасы аудандарымен байланыстырып, Ресей Федерациясына шығуға мүмкіндік береді.

Мердігер ұйым Өнеге-Бисен-Сайқын күре жолының соңғы 10 шақырымын салып, аяқтайды. Бір ай ішінде мамандар жолды абаттандыру жұмыстарына кіріседі. Күрделі жөндеу жұмыстары аясында жаңа жарықтандыру мен жол белгілерін орнатып, жол таңба сызығын сызады. Сонымен қатар, жолшылар Жәңгір хан резиденциясына (Р-56 «Хан Ордасы ауылына кіреберіс жол») апаратын жалғыз жолды орташа жөндеу жұмыстарымен қамтыды. Бұл учаске республикалық маңызы бар «Өнеге-Бисен-Сайқын-РФ шекарасы» автожолының және Батыс Қазақстан облысы Бөкейорда ауданы Хан Ордасы ауылының арасында орналасқан.

Нысандарда 370 техника мен 500 адам жұмыс істейді.

Күре жолдар халық игілігіне берілген соң көлік қарқыны бірнеше есе артады деп күтілуде. Барлық жұмыстар биыл жылдың соңына дейін аяқталады.