47 жастағы фермерді өлтірді деген күдікпен Құлсары қаласының 1982 жылғы тұрғыны ұсталды. Күдікті бұған дейін де істі болған.
ERNUR.KZ. Атырау облысында бір жұма бұрын жоғалып кеткен 47 жастағы фермердің денесі шұңқырдан табылды. Күдікті ұсталды, деп жазады sputniknews.kz.
Жылыой ауданының тұрғыны, фермер Нұрәлі Нұртілеуов 6 қыркүйекте жоғалған бір үйір жылқыны іздеуге шығып, сол күйі оралмаған.
Ер адамды облыс полицейлері, төтенше жағдай департаментінің қызметкерлері мен еріктілер іздеді.
"Іздеу жұмыстары нәтижесінде полицейлер 14 қыркүйек күні таңертең Жылыой ауданы Құлсары қаласынан 100 шақырым жерде тереңдігі 15-20 метр шұңқырдан Нұртілеуовтің мәйітін тапты", - делінген хабарламада.
Күдікті ұсталды. Ол Құлсары қаласының 1982 жылғы тұрғыны, бұрын істі болған.
Қылмыстық кодекстің 99-бабы "Адам өлтіру" бойынша сотқа дейінгі тергеу жүріп жатыр. Бұл бап бойынша сегіз жылдан он бес жылға дейiнгi мерзiмге бас бостандығынан айыру жазасы қарастырылған.
