Жаздың ыстық кезеңінде Қазақстанда жедел ішек инфекцияларының таралу қаупі сақталып отыр. Жыл басынан бері елімізде аурудың 7,5 мыңнан астам жағдайы тіркелді.
ERNUR.KZ. Оның ішінде 71%-дан астамы – 14 жасқа дейінгі балалар, ал 18%-ы – 1 жасқа дейінгі балалар. Сонымен қатар өткен жылмен салыстырғанда сырқаттанушылық деңгейі 12%-ға төмендеді. Бұл туралы ҚР Денсаулық сақтау министрлігі Санитариялық-эпидемиологиялық бақылау комитетінің төрағасы Сархат Бейсенова ОКҚ алаңында өткен баспасөз конференциясында мәлімдеді.
«Аурудың әрбір жағдайы бойынша инфекцияның одан әрі таралуына жол бермеуге бағытталған эпидемияға қарсы іс-шаралар кешені жүргізіледі. Эпидемиологиялық тергеп-тексеру аясында 3 100-ден астам байланыста болған адам тексерілді. Инфекцияның берілу факторларын анықтау үшін 1 300 азық-түлік өнімінің үлгісі және 900-ден астам су сынамасы зерттелді. Сонымен қатар объектілердің санитариялық жағдайына зертханалық бақылау жүргізілді: ішек таяқшасы тобы бактерияларына 4 200 шайынды және патогенді микрофлораға 7 700 шайынды алынды», – деді спикер.
Сонымен қатар ол жедел ішек инфекцияларының алдын алудың негізгі шараларын еске салды.
Азаматтарға жеке бас гигиенасы қағидаларын сақтау, тамақ әзірлер алдында, тамақ ішер алдында және дәретханаға барғаннан кейін қолды сабынмен мұқият жуу ұсынылады. Тек қауіпсіз ауыз суды пайдалану қажет. Азық-түлік өнімдерін сақтау талаптарын сақтау және оларды, әсіресе ет, құс еті, балық, жұмыртқа және сүт өнімдерін жеткілікті термиялық өңдеуден өткізу қажет.
Азық-түлік өнімдерін рұқсат етілмеген сауда орындарынан сатып алмау және олардың жарамдылық мерзіміне назар аудару қажет. Көкөністерді, жемістерді, жидектер мен көкөніс шөбін тұтынар алдында мұқият жуу керек. Ішек инфекциясының алғашқы белгілері – жүрек айну, құсу, іш өту, дене қызуының көтерілуі, іштің ауыруы байқалған жағдайда дер кезінде медициналық көмекке жүгініп, өздігінен емделмеу қажет.
