Синоптиктер қаңтар айында ауа райы қандай болатынын айтты.
ERNUR.KZ. Синоптиктер қаңтар айында ауа райы қандай болатынын айтты, деп жазады Tengrinews.kz "Қазгидромет" орталығына сілтеме жасап.
Синоптиктердің болжамынша, қаңтарда орташа айлық ауа температурасы республиканың оңтүстік-батыс, оңтүстік және оңтүстік-шығысында нормадан 1 градустан жоғары, ал қалған аймақта климаттық нормаға жақын болады.
"Бірінші декаданың басында республиканың солтүстік, солтүстік-шығыс және орталық аймақтары суық антициклонның ықпалында болады. Термометрдің сынап бағанасы түнде 25...30, кей жерлерде 35 градусқа дейін аяз, күндіз 15...20, кей жерлерде 25 аязға дейін төмендейді", - дейді "Қазгидромет" өкілдері.
Сондай-ақ, синоптиктердің мәліметінше, еліміздің батыс, оңтүстік-батыс және оңтүстігіне жылы ауа массалары келіп, жауын-шашын түседі. Ауа температурасы: түнде 2...7, кей жерлерде 12 градус аяз, күндіз 0...5 жылы, кей жерлерде 5 градусқа дейін аяз болады.
