Қазақстанда әскери жүктерді тасымалдайтын арнайы вагон шығарылды

Вагонның жаңа нұсқасын Бурабай локомотив-вагон жөндеу депосы шығарды. Мамандар ескі қарауыл вагондарын қайта жабдықтап, әскери жүктерді тасымалдауға арналған вагон жасады.

Қарулы Күштер Тыл бастығының міндетін уақытша атқарушы полковник Әсет Оразалиннің айтуынша, техникалық талаптарға сәйкес жабдықталған вагондардың іске қосылуы қарауыл қызметін айтарлықтай жақсартады.

"Қолданыстағы келісімшарт бойынша 2025 жылдың наурызына дейін біз осындай 10 вагон аламыз", – деді Оразалин салтанатты шарада.

Вагонда ұйықтайтын орындар, санитарлық торап, киімге арналған бұрыш, пеш және су құятын бөшке бар. Ал техникалық бөлімде қару-жарақ сақтайтын жәшіктер мен оқ өтпейтін қорғағыштар, өрт сөндіру қалқаны, көмір мен құм жәшіктері орнатылған. Вагондағы электр жабдықтар күннен қуат алады.