"Өнім таңбаланбаған": Дәрігерлер Ақтөбедегі оқушылардың жаппай улану себебін анықтай алмай жатыр

Санитарлық-эпидемиологиялық бақылау департаментінің мәліметінше, қнім таңбаланбағандықтан микробиологиялық және санитарлық-химиялық көрсеткіштер бойынша зертханалық зерттеу жүргізу мүмкін емес.

18 ақпанда Қобды ауданында мектеп оқушылары белгісіз өнімнен жаппай уланды. Белгісіз өнімді жергілікті дүкеннен олардың сыныптасы сатып алып, басқа балаларға таратқан. 4-сыныптың 7 оқушысы қытайлық белгісіз өнім жеп, уланып, ауруханаға жеткізілді. Қалған 16 бала өнімнің иісінен уланған.

Ауруханада екі күн ем алған оқушылардың жағдайы қалыпқа келді. Дүкенде тағы 12 қорап жеңіл тағамдар табылып, тәркіленді. Сондай-ақ тексерулерден кейін облыстағы 270 дүкеннен дәл сондай өнімнің 16 данасы табылды. Қауіпті өнімнің сауда орындарына қалай жеткізілгенін жауапты органдар анықтап жатыр.

“Зерттеу барысында өнімдердің Кеден одағының техникалық регламентінің талаптарына сәйкес келмейтіні, атап айтқанда атауы, құрамы, жарамдылық мерзімі, сақтау шарттары, пайдалану шектеулері, тағамдық құндылығы мемлекеттік және орыс тілдерінде таңбаланбағандығы анықталды”, – дейді Ақтөбе облысы бойынша санитарлық-эпидемиологиялық бақылау департаментінің басшысы Райхан Қойшанова.

Анықталған қауіпті өнімдерге қатысты субъектілерге сатылымнан алынған өнімді тәркілеу және кері қайтарып алу туралы 3 ұйғарым шығарылды.