Жануарды осылайша жазалап, иесін қорқытпақ болған адам әзірге анықталған жоқ.
Бейнеден алынған кадр
ERNUR.KZ. Жетісу облысында полицейлер тірі сиырдың үстіне бояумен қорқыту мағынасындағы жазу жазып кеткен белгісіз адамды іздестіріп жатыр, деп жазады tengrinews.kz.
Бүйіріне "өлтіремін" деп жазылған жануардың видеосы әлеуметтік желілерде тарап жатыр. Оқиға Ақсу ауданының Қызылағаш ауылында болғаны айтылды.
"Сиырым біреудің бақшасына кіріп кетсе керек. Не істейсің, мал - аузы жоқ мақұлық. Бірақ жануарды бұлай қорлауға кімнің дәті барды? Оның көзіне бояу құйып жіберген, әрең жуып тазаладым, ал бүйіріне "өлтіремін" деп үлкен қылып жазып қойған", - дейді видео авторы.
Жануарды осылайша жазалап, иесін қорқытпақ болған адам әзірге анықталған жоқ. Ауыл тұрғыны белгісіз адамның бұл әрекетінен жануарға қатыгездікпен қарау белгілерін көріп, Ақсу аудандық полициясына тиісті арыз түсірді.
Тәртіп сақшылары іздестіру шараларын бастап кетті, олар жағдайды толық анықтап, шара қолдануға уәде берді.
"Тексеру нәтижесі бойынша және оқиғаның барлық мән-жайы анықталғаннан кейін, қолданыстағы заңнама талаптарына сәйкес тиісті процестік шешім қабылданады", - деп хабарлады Жетісу облысы ПД баспасөз қызметі.
Сондай-ақ ведомство өкілдері кез келген жанжалды жағдайлар, соның ішінде барлық даулы мәселелер тек құқықтық аяда шешілуі тиіс екенін еске салды.
