Түркістандық ОҚУШЫ әлемнің 86 УНИВЕРСИТЕТІНЕ шақырту алды

сурет: Түркістан облысы, білім басқармасынан

«Үлкен армандар – үлкен жетістіктердің бастауы» деген сөз бар. Бұл сөздің шынайы өмірде дәлеліне айналған жас дарын – Арыс қаласының тумасы, Абай атындағы Білім-Инновация лицейінің 11-сынып оқушысы Айсұлтан Алтынбек. Оның есімі бүгінде тек Арыстың ғана емес, бүкіл Қазақстанның мақтанышына айналды. Себебі Айсұлтан 2025 жылы әлемнің 9 еліндегі 86 университеттен шақырту алып, жалпы сомасы 4,6 миллион доллар болатын грант иегері атанды!

Айсұлтан бала кезінен компьютерге, техникаға, жаңа технологияларға ерекше қызығушылық танытқан. Әкесі алғаш рет алып берген ескі ноутбуктен бастап оның шексіз әлемге деген құштарлығы оянды. Ол өзі ойнаған ойындардың қалай жасалатынын білгісі келіп, зерттей бастады. Интернеттен видеолар көріп, бағдарламалау тілдерін өз бетінше меңгеруге кірісті. Оның ең үлкен арманы – ойындар жасап, адамдарға қуаныш сыйлау, сонымен қатар IT саласын дамытып, Қазақстанды цифрлы тұрғыда дамыған елдердің қатарына қосу. Бұл арман оны тоқтаусыз үйренуге, үнемі өзін дамытуға мотивация болған.

Жетістік ешқашан оңайлықпен келмейді. Айсұлтан күн сайын өзін дамытып, ағылшын тілін жетілдіріп, халықаралық олимпиадаларға қатысты. Ол тек үздік оқушы ғана емес, сонымен қатар білімге ынталы, еңбектен қорықпайтын жас. Өзінің айтуынша, кей күндері 12 сағаттан артық уақытын тек оқуға, үйренуге, тест тапсыруға арнаған екен.

Сонымен қатар, ол көптеген стипендия бағдарламаларын зерттеп, университеттерге мотивациялық хаттар, эссе, портфолио дайындаған. Оның табандылығы мен тәртіпке бағынған еңбегі – бүгінгі үлкен табысының кілті. Айсұлтанға АҚШ, Германия, Ұлыбритания, Канада, Малайзия, Испания және тағы басқа алдыңғы қатарлы елдердегі университеттерден ресми шақыртулар келді. Олардың ішінде Массачусетс технологиялық институты (MIT), Гарвард, Стэнфорд сынды әлемдегі ең үздік жоғары оқу орындары да бар. Ол таңдаған оқу орындарына тек ақылы түрде емес, толық грантпен оқуға мүмкіндік алған. Бұл – кез келген талапкердің арманы. Бұл – Қазақстанның қарапайым ауыл баласының, таза еңбектің, тәртіп пен мақсатшылдықтың жеңісі.

Айсұлтанның оқушыларға кеңестері

Айсұлтан өзінен кейінгі іні-қарындастарына, жас достарына мынадай кеңестер береді:

1. Армандаудан қорықпаңдар. Армандар қаншалықты үлкен болса, соғұрлым мақсат айқын болады.
2. Тіл үйренуге күш салыңдар. Ағылшын тілі – әлемге ашылған терезе. Қанша жерден мықты болсақ та, егер әлеммен тіл табыса алмасақ, мүмкіндігіміз шектеулі болады.
3. Уақытты бос өткізбеңдер. Телефонды ойын мен әлеуметтік желіге ғана емес, үйренуге де пайдаланыңдар.
4. Өздеріңе сеніңдер. Біреу мазақ етсе де, түсінбесе де, өз жолыңмен жүре біл.

Арыс қаласы көпке дейін теміржол торабы ретінде танылып келген. Енді сол Арыстан әлемнің үздік университеттеріне жол салған Айсұлтан сияқты жастар шығып жатыр. Бұл – әрбір ауыл баласына, шалғайдағы мектеп оқушысына үміт отын жағатын оқиға.

Айсұлтан Алтынбектің жетістігі – жай ғана сәттілік емес, бұл – табандылық, еңбек, тәртіп, сенім мен арманның жемісі. Егер сіз де арман қуып, өзіңізге сенсеңіз, білім алуға талпынсаңыз – ертең дәл сіз туралы да бүкіл ел мақтанышпен айта бастайды.

Сен де жасай аласың! Бәрі тек өз қолыңда!