Шымкент әкімі қаладағы құрылыстарға қатысты бірнеше сын-ескертпелер жасады

Шымкент қаласының әкімі Ерлан Айтаханов шаһарда салынып жатқан бірнеше құрылыс нысандарының жұмысымен танысты, деп хабарлайды ERNUR.KZ.

Ең алдымен әкімшілік іскерлік орталығындағы тұрғын үйлердің құрылысымен танысқан қала басшысы мердігер мекеменің басшысына жұмысты жандандырып, нысанды мерзімде аяқтау қажеттігін айтты. Сондай-ақ, жауапты сала басшыларына инфрақұрылым мәселесін де тез әрі оңтайлы шешуді тапсырды.

Одан соң Ерлан Қуанышұлы С.Бәйтереков көшесінде орналасқан «Tamerlan Residence» тұрғын үй кешенінің құрылысына барды. Аталған нысанның тапсырысшысы болып табылатын «BI Group» ЖШС-сі құрылысты келесі жылдың тамыз айында аяқтауды жоспарлап отыр. Мұнда 16 және 12 қабатты 7 тұрғын үй бой көтеретін болады.

Сондай-ақ, қала әкімі «Ақжайық» және «Көкжайлау» тұрғын үй кешендерінің құрылысына барып, аталған нысандарды салып жатқан мердігер мекемелердің өкілдерімен кездескен Е.Айтаханов тұрғын үйлердің қасбетіне баса көңіл аударып, қаланың көркін ашатындай етіп салуды тапсырды. Одан кейін, «Тұран» ықшам ауданындағы 1200 орындық мектептің құрылысына барған қала басшысы мұндағы шешілмей жатқан түйткілді коммуналдық мәселелермен қатар, балалардың білім алуына қолайлы жағдай жасалауы керектігін нықтап айтты.

Сонымен қатар, Ерлан Айтаханов аталған нысандардың құрылысын жүргізіп жатқан барлық мердігерлерге бірнеше сын-ескертпелер жасады.

«Мұндай тұрғын үйлерді саларда ең алдымен инфрақұрылым мәселесін шешкен жөн. Сондай-ақ, мүмкіндігі шектеулі жандарға арналған пандустар болуы шарт. Салынып жатқан тұрғын үйлердің қасбеті заман талаптарына сай әрі әсем болуы керек. Шымкент – мегаполис қала. Демек, біз жаңаша ойлап, қаламыздың көркеюіне баршамыз ат салысуымыз қажет», - деді Е.Айтаханов өз сөзінде.

Айта кетейік, бүгінгі таңда қала бойынша тұрғын үй құрылысына жалпы мемлекет тарапынан 34,6 млрд.теңге (құрылыс басқармасы - 20,3 млрд.тг; “SHYMKENT” ӘКК” АҚ - 10 млрд.тг; Тұрғын үй және тұрғын үй инспекциясы басқармасы жастарға жалдамалы пәтерді сатып алуы үшін - 4,3 млрд.тг.) қарастырылған.

дереккөз: Шымкент қаласы әкімдігінің баспасөз қызметі