Шымкентте тұрғын үйлердің аулалары абаттандырылып жатыр

Еңбекші ауданында бұған дейін ауласы абаттандырылмаған 64 көпқабатты үйдің ауласы абаттандырылып, ойын алаңдары орнатылуда. Сонымен қатар, 43 көппәтерлі тұрғын үйдің аулалары мен балалар ойын алаңшаларына қайта жөндеу жұмыстары жүргізіліп отыр. Бұл жұмыстарға биылғы жылы әр ауданның бюджетіне бөлінген 1 млрд теңгеден 800 миллионнан астам қаржы қаралған.

Оның ішінде «Жұмыспен қамту жол картасы» бағдарламасы бойынша көпқабатты тұрғын үй ауласын абаттандыруға республикалық бюджеттен 75,8 млн. теңге бөлінген. Нысандар осы жылдың тамыз, қыркүйек айларында пайдалануға беріледі.

Шымкент әкімі Мұрат Әйтенов Еңбекші ауданының аулаларын абаттандырудың барысын тексерді. Жұмыстың сапасына баса назар аударған қала басшысы орындықтар мен кіші архитектуралық формалар сынды орнатылатын элементтерді сапалы материалдардан пайдалануды айтты.

Аудан әкімі Ғалымжан Ильясов ауланы абаттандыру бойынша атқарылып жатқан жұмыстар жайын баяндап, биылғы жылы бұдан бөлек, 6 ашық спорт алаңшасы мен аула аралық тозығы жеткен 8 мекенжайдағы баспалдақтарды қайта құру жұмыстары жүргізіліп жатқанын атап өтті. Сондай-ақ, аудан әкімі 2021 жылы аудан аумағындағы 100-ден аса үй ауларын жөндеу және балалар ойын алаңдарын қайта құру жоспарланғанын жеткізді.