ТҮРКІСТАН: Облыста 1400 шақырымға жуық жол пайдалануға беріледі

Түркістан облысында биыл 1400 шақырымға жуық жол пайдалануға беріледі, деп хабаралайды ERNUR.KZ.

Түркістан облысында жергілікті маңызы бар автомобиль жолдары мен елдімекен көшелерінің жалпы ұзындығы – 16 746,9 шақырымды құрап отыр. 2019 жылы автомобиль жолдары саласын дамытуда 1 705,1 шақырым жол мен 11 көпірге құрылыс-жөндеу жұмыстары жүріп, жыл соңына дейін 585 нысан, яғни 1 391,8 шақырым жол пайдалануға берілетін болады.

Облыс орталығы - Түркістан қаласы бойынша көшелердің жалпы ұзындығы - 845 шақырым. Ағымдағы жылы Түркістан қаласының көшелерінде жөндеу жұмыстарын жүргізуге облыстық бюджеттен – 6,5 млрд. теңге қаралған. Қазіргі таңда 12,6 шақырым құрайтын 3 көшеге күрделі жөндеу жұмыстары жүргізілуде. Оның 2-і ағымдағы жылы пайдалануға беріледі деп күтілуде. Сонымен қатар, қалада 70 шақырымды құрайтын 63 көшеге орташа жөндеу жұмыстары жүргізіліп, биылғы жылы пайдалануға берілетін болады. Бұдан өзге, 96,23 шақырымдық 83 көшеге тас төсеу жұмыстары жүргізіліп жатыр.