Ауырып дәрі ішіп жүрген ит отшашудан жүрегі жарылып өлді

ERNUR.KZ. Ұлыбританияда мәскеулік күзетші ит отшашудың дауысынан қорқып өлді, деп жазады sputniknews.kz.

Жағдай 5 қараша күні Үлкен Манчестер графствосында Гай Фокс түнін тамашалап жатқан кезде болды. Адамдар иттердің отшашудан қорқатынын біліп, оларды мереке қарсаңында қамап қойған. Барлығы тынышталғаннан кейін иттер қайтадан сыртқа шығарылды.

Алайда араға аз уақыт салып аспанда петарда мен зымырандар жарылады. Осы сәтте сыртта жүрген иттер қатты қорқып, жақын маңдағы ғимаратқа жүгіріп кіреді. Арасында салмағы 80 килограмға жуықтайтын мәскеулік Уинстон есімді ит сыртта қалып қояды. Қатты мазасызданған Уинстонның жүрегі тоқтап қалған. Ертесінде үй қызметкерлері оны өлі тауып алды.

Уинстонның жасы шамамен сегізде. Ол Болгариядан әкелінген болатын. Жүрегі бұрыннан ауырып, күн сайын дәрі ішіп жүрген.

Иттер үйінің иесі Эмма Биллингтон Уинстонның қатты шыққан дауыстарды ұнатпағанын айтты. Сондай-ақ, ол жақын маңда отшашуды кімдер ұйымдастыруы мүмкін екенін де білмей отырғанын жеткізді. Себебі иттер үйі адамдар жүретін жерден жырақта орналасқан.

"Біз адамдарға отшашудың иттер үшін қаншалықты ауыр тиетінін түсіндіруіміз керек. Мына заманда отшашудың ешқандай қажеті жоқ деп ойлаймын. Олар Уинстонның өліміне кінәлі. Бұл ит өмір бойы адамдардан қорлық көріп келген еді", — деді Биллингтон.

Бұл үйде иттерді темір торға қамамайды, олар еркін жүреді. Еріктілер Ұлыбритания, Кипр, Румыния және Болгариядан сол жерге иттерді алып келеді.