Көп жүргізуші «көбікті шаштым, сумен шайдым – болды» деп ойлайды.
сурет: ЖИ
Көлікті өзіне-өзі қызмет көрсету орнында жуу – уақыт пен ақшаны үнемдеудің ыңғайлы тәсілі. Алайда көлік жуу аппаратындағы жоғары қысымды суды дұрыс пайдаланбау немесе жуу ретін сақтамау шанаққа пайда емес, бояу қабатына зиян келтіруі мүмкін.
Көп жүргізуші «көбікті шаштым, сумен шайдым – болды» деп ойлайды. Шын мәнінде, сапалы жуу үшін бірнеше маңызды ережені сақтау қажет. Әсіресе шанаққа шаң, құм және жолдағы ұсақ кір көп жиналған кезде дұрыс техника қолданбасаңыз, көліктің лак-бояу қабатында ұсақ сызаттар пайда болуы ықтимал.
ЕҢ АЛДЫМЕН КӨЛІКТІ СУЛАҒАН ДҰРЫС
«Самамойкаға» келген бойда бірден көбік шашуға асықпаған жөн. Алдымен көліктің кузовын таза сумен толық шайып алған дұрыс.
Бұл кезеңнің негізгі мақсаты – шанақ бетіндегі шаң-тозаң, құм, тұз және басқа да ірі ластануларды босату. Себебі олардың бір бөлігі кузовта қалып қойса, кейінгі жуу кезінде абайсызда үйкеліп, лак қабатына ұсақ сызат түсіруі мүмкін.
Жоғары қысымды суды шанаққа тым жақындатпай, белгілі бір қашықтықтан ұстаған жөн. Әсіресе бояуы зақымданған, пластик элементтері босап тұрған немесе резеңке тығыздағыштары ескірген көліктерде аса сақ болған дұрыс.
КӨБІКТІ ҚАЛАЙ ДҰРЫС ШАШУ КЕРЕК?
Келесі кезең – арнайы автошампунь немесе көбік шашу. Көбікті кузовтың барлық бөлігіне біркелкі шашуға тырысу керек. Әдетте көліктің төменгі бөліктері – бампер, табалдырық, доңғалақ маңы – көбірек ластанады. Сондықтан бұл аймақтарға ерекше назар аударған жөн.
Көбікті жағып болған соң бірден шайып тастауға болмайды. Оның кірді жібітуіне бірнеше минут уақыт берген дұрыс. Бірақ көбік кузовта кеуіп қалмауы керек.
Көлікті күннің астында жуып тұрсаңыз, көбік өте тез кебуі мүмкін. Бұл жағдайда ұзақ күтпей, бағдарламаның нұсқаулығына сәйкес жұмыс істеген дұрыс.
ЕҢ ҮЛКЕН ҚАТЕЛІК – ЩЕТКАНЫ БІРДЕН ҚОЛДАНУ
Көп жүргізуші «самамойкадағы» щетканы бірден алып, кузовты ысқылай бастайды. Бұл – ең жиі кездесетін қателіктердің бірі. Себебі щеткада алдыңғы көліктен қалған құм немесе кір болуы мүмкін. Оны кузовқа қатты басып үйкеген кезде лак-бояу қабатында ұсақ сызаттар пайда болуы ықтимал.
Сондықтан щетканы қолдану қажет болса, алдымен оны сумен өте мұқият шайып алған жөн. Дегенмен кузовтың бояуын барынша сақтау үшін щетканы қолданбай, жоғары қысымды сумен және сапалы автохимиямен жуу қауіпсіздеу.
КӨЛІКТІ ҚАЙ ЖЕРДЕН БАСТАП ЖУҒАН ДҰРЫС?
Жуу кезінде жоғарыдан төмен қарай қозғалған дұрыс.
Алдымен: шатыр; әйнектер; капот; жүксалғыш қақпағы; есіктердің жоғарғы бөлігі; кейін төменгі бөліктер; ең соңында доңғалақтар мен табалдырықтар жуылады.
Себебі төменгі бөліктердегі кір әлдеқайда көп болады. Егер ең лас жерлерді алдымен жуып, кейін сол құралмен кузовтың таза бөліктеріне өтсеңіз, кірді қайтадан таратып жіберуіңіз мүмкін.
ДӨҢГЕЛЕКТЕРГЕ ЕРЕКШЕ КӨҢІЛ БӨЛІҢІЗ
Дөңгелек дискілері мен шиналар кузовқа қарағанда әлдеқайда қатты ластанады. Сондықтан оларды бөлек жуған дұрыс. Тежегіш колодкаларынан пайда болатын шаң дискілерге жабысып қалады. Оны жай сумен кетіру қиын болуы мүмкін. Егер самамойкада дискілерге арналған арнайы бағдарлама болса, соны пайдалануға болады. Бірақ химиялық құралды ұзақ уақыт қалдырмаңыз және өндірушінің нұсқаулығын сақтаңыз.
КӨБІКТІ ЖОҒАРЫ ҚЫСЫМДЫ СУМЕН МҰҚИЯТ ШАЙЫҢЫЗ
Көбік кірді жібіткеннен кейін оны жоғары қысымды сумен толық шайып тастау керек. Суды кузовқа тым жақын ұстап, бір нүктеге ұзақ бағыттамаған жөн. Әсіресе эмблемаларға, пластик бөлшектерге, камераларға, датчиктерге, резеңке тығыздағыштарға және бояуы зақымданған жерлерге абай болу керек. Судың бағытын біркелкі жүргізіп, жоғарыдан төмен қарай шайған тиімді.
«ВОСК» ҚАЖЕТ ПЕ?
«Самамойкаларда» көбіне жуу бағдарламаларының ішінде «воск» немесе балауызбен қаптау кезеңі болады. Оны қолданудың белгілі бір пайдасы бар: кузов бетінде су тамшыларының тұруын азайтуға және кірдің қайта жабысып қалуын біршама баяулатуға көмектеседі. Бірақ мұндай бағдарлама кәсіби керамикалық жабынның немесе сапалы қорғаныш жабынының орнын баспайды. Сондықтан «воск қолдандым, енді көлігім толық қорғалды» деп ойлау дұрыс емес.
ЕҢ СОҢҒЫ КЕЗЕҢ – ТАЗА СУМЕН ШАЮ
Егер «самамойкада» деминерализацияланған немесе осмос арқылы тазартылған сумен шаю бағдарламасы болса, соңында қолдануға болады. Бұл әсіресе судың құрамында минералдар көп болатын жерлерде пайдалы. Кәдімгі су кепкеннен кейін кузовта ақ дақтар мен іздер қалуы мүмкін.
Соңғы шаюдан кейін көлікті мүмкіндігінше табиғи түрде кептірген дұрыс.
КӨЛІКТІ СҮРТУ КЕРЕК ПЕ?
Көлікті жуғаннан кейін оны таза микрофибрамен сүртуге болады. Бірақ микрофибраның өзі таза болуы өте маңызды. Еденге түсіп кеткен немесе құм жиналған шүберекпен кузовты сүрту – бояуды сызудың тағы бір кең таралған себебі. Микрофибраны кузовқа қатты баспай, жеңіл қозғалыспен пайдаланған жөн. Егер көлік өте лас болса, алдымен кірді толық шайып алған дұрыс.
КӨПШІЛІК ЖІБЕРЕТІН 7 ҚАТЕЛІК:
1. Көлікті алдын ала сумен жумай, бірден көбік жағу.
Кузовтағы құм мен шаң кейінгі механикалық әсер кезінде сызат түсіруі мүмкін.
2. Лас щетканы қолдану.
Щеткадағы құм мен кір кузовты қажауы ықтимал.
3. Көбікті кептіріп алу.
Күн ыстық кезде химиялық құрал кузовта кеуіп қалса, із қалдыруы мүмкін.
4. Жоғары қысымды суды кузовқа тым жақын ұстау.
Бұл әлсіз бояу қабатына, жабыстырылған элементтерге және резеңке бөлшектерге кері әсер етуі мүмкін.
5. Бір шүберекпен барлық жерді сүрту.
Осылайша дөңгелек пен табалдырықтағы кірді кузовқа жағуға болады.
6. Дөңгелек пен кузовты бір құралмен жуу.
Дөңгелектегі кір әлдеқайда агрессивті болуы мүмкін.
7. «Қымбат бағдарлама – ең жақсы жуу» деп ойлау.
Бағдарламаның атауына емес, оның нақты мақсатына және жуу реттілігіне мән берген жөн.
ҚАНША УАҚЫТ ЖЕТКІЛІКТІ?
Көлік аса лас болмаса, жууға шамамен 10–15 минуттың өзі жеткілікті болуы мүмкін. Бірақ уақытты үнемдеймін деп негізгі кезеңдерді өткізіп жіберудің қажеті жоқ.
Егер көлік лайға, тұзға немесе битумға қатты былғанса, қосымша автохимия немесе арнайы тазалау қажет болуы мүмкін.
КӨЛІКТІ ЖИІ ЖУҒАН ДҰРЫС ПА?
Көлікті қаншалықты жиі жуу керектігі оның қандай жағдайда пайдаланылатынына байланысты. Қалада күнделікті жүретін көлікте шаң-тозаң тез жиналады. Қыста жолдағы тұз бен реагенттер кузовқа кері әсер етуі мүмкін. Сондықтан көлік қатты ластанған кезде оны ұзақ уақыт жуусыз қалдырмаған жөн. Әсіресе қыс мезгілінде кузовтың төменгі бөлігіне, табалдырықтарға және доңғалақ аркаларына ерекше көңіл бөлген дұрыс.
ЕҢ БАСТЫСЫ – АСЫҚПАУ
«Самамойкада» көлікті дұрыс жуу үшін арнайы маман болудың қажеті жоқ. Ең бастысы – реттілікті сақтау және кузовқа артық механикалық әсер етпеу. Көлікті жақсы жуудың басты қағидасын үш сөзбен айтуға болады: алдымен жібіту, кейін шаю, соңында кептіру.
Ал ең маңызды ереже – кузовты кір күйінде қатты ысқыламау. Өйткені көліктің сыртқы көрінісін нашарлататын ұсақ сызаттардың көбі дәл осы қарапайым қателіктерден пайда болады.
Дұрыс жуу техникасын әдетке айналдырсаңыз, көлігіңіздің бояуы жылтырлығын ұзақ сақтап, кузовтың сыртқы көрінісі де жақсы күйде болады.
Дайындаған: Б.Мейірханұлы,
Тағы оқыңыз:
ГАЗ немесе БЕНЗИН: Қайсысын таңдаған тиімді?
Көлікке арналған ҮЗДІК БЕЙНЕТІРКЕГІШТЕР: Дәл қазір қайсысын таңдаған дұрыс?
