Заманауи технологиялық жаңалықтар адамзат үшін ғана жасалмайды.
фото: ЖИ
Адамдар жаңа технологиялардың өмірді жақсартып, жұмысты жеңілдететініне үйренген. Робот шаңсорғыштар үйді өзі тазалайды, мультипісіргіш сіздің қатысуыңызсыз тағам әзірлейді, кофемашина сүйікті сусыныңызды дайындап ұсынады...
Бір қызығы, заманауи технологиялық жаңалықтар адамзат баласы үшін ғана жасалмайды. Мәселен, үй жануарларына арналған қаншама гаджеттер бар. Кей өнертапқыштар үй жануарларының тілін түсіну үшін адам тіліне аударуға тырысса, енді біреулері оларға «тыныштық» сыйлағысы келеді. Ал үшіншілері тауықтардың жұмыртқаны көбірек беруіне жағдай жасамақ.
Қазіргі кезде үй жануарларына арналған гаджеттер өте қарқынды дамып жатыр. Олар тек күтімді жеңілдетіп қана қоймай, жануардың денсаулығын, қауіпсіздігін және көңіл-күйін бақылауға көмектеседі.
1. Ақылды жем бергіштер (Smart feeder)
Фото: ir.ozone.ru
Бұл – ең танымал гаджеттердің бірі. Үй құстарына белгіленген уақытта автоматты түрде жем-суын береді. Смартфон арқылы басқаруға болады. Камера арқылы үй жануарыңызды бақылап отырасыз. Дыбыс арқылы сөйлесуге мүмкіндік бар.
Мұндай құрылғылар иесі үйде болмаса да, құстардың уақытылы тамақтануын қамтамасыз етеді және артық тамақтанудың алдын алады.
2. Үй жануарларына арналған камералар (Pet cameras)
Бұл құрылғылар жануарды қашықтан бақылауға арналған. Негізгі мүмкіндіктері:
- Онлайн видео (HD, түнгі режим)
- Қозғалысты анықтау
- Иттің үруін немесе дыбыстарды тану
- Иесімен екі жақты байланыс
Кейбір жаңа модельдер жануар мен адамды ажыратып, арнайы хабарлама жібереді
3. GPS-трекерлер (ақылды қарғыбаулар)
Ит немесе мысық жоғалып кетпеуі үшін қолданылады. Функциялары:
- Нақты уақыттағы орналасуын көрсету
- Қауіпсіз аймақ (гео-аймақ) орнату
- Белсенділік деңгейін бақылау
Бұл әсіресе далаға жиі шығатын жануарлар үшін өте пайдалы.
4. Интерактивті ойыншықтар
Фото: cdn1.ozone.ru
Жануардың зерігуін болдырмайды. Мысалы:
- Автоматты доп лақтырғыштар
- Қозғалатын ойыншықтар
- Лазерлі құрылғылар
Кейбіреуі телефон арқылы басқарылып, жануармен қашықтан ойнауға мүмкіндік береді.
5. Денсаулық пен белсенділікті бақылайтын құрылғылар
Бұл – «фитнес-браслет» сияқты гаджеттер. Мүмкіндіктері:
- Қанша жүргенін есептеу
- Ұйқы режимін бақылау
- Жүрек соғуын өлшеу (кейбір модельдерде)
Кейбір заманауи жүйелер тіпті жануардың мінез-құлқындағы өзгерістер арқылы ауруды ерте анықтауға тырысады
6. Ақылды есіктер (Smart pet door)
Тек белгілі бір жануарға ғана ашылады. Бөтен жануарлардың кіріп кетуіне жол бермейді. Рұқсат етілген үй жануарын чип немесе арнайы белгі арқылы таниды.
7. Автоматты дәретхана
Фото: alexander-belov.com
Мұндай дәретханалардың әсіресе мысықтарға арналған түрлері кең қолданыста. Ол нәжістен өзін-өзі тазалайды, иісті азайтады. Мәселе тындаған не басқа да қажетті жағдайларда қолданушының смартфонына хабарлама жібереді.
8. Тауықтарды тыныштандыру жүйесі
Үй тауықтары да күйзеліске ұшырайды екен. Оларға жайлы жағдай жасап, босаңсуына мүмкіндік берілсе, жұмыртқалау қабілеті артады. Осы мақсатта тауықтарды тыныштандыру жүйесі мен әдісі ойлап табылып, патенттелген. Әдісті әзірлеушілердің айтуынша, бұл жүйе құстың күйін тұрақтандырып, тіпті инфекцияларға төзімділігін түрде алады. Ол үшін құрылғыға дыбыс генераторы, «босаңсытатын» дыбысты модуляциялайтын блок және аудио шығару жүйесі енгізілген. Бірінші кезеңде құсты сергіту үшін жиілігі біртіндеп өсетін дыбыс беріледі. Екінші кезеңде жиілік бірде төмендеп, бірде жоғарылап, босаңсытатын әсер туғызады. Үшінші кезеңде жиілік біртіндеп азайып, құсты ұйқыға жетелейді. Осындай «кері будильникпен» басталатын дүйсенбі таңы тауықтардың денсаулығына пайдалы болып, өнімділігін арттырады дейді әзірлеушілер.
9. Жануарлармен байланыс орнату құрылғысы
Жануарлармен сөйлесу туралы көптеген фильмдер түсіріліп, кітаптар жазылған. Үй жануарларының тілін түсіну идеясы әлі де ғылыми фантастика сияқты. Дегенмен, біз жануарлармен байланыс орнатуға арналған құрылғыны сипаттайтын патентті таптық.
Бұл – бірнеше сенсорлық әсерді (көру, иіс, жанасу және дыбыс сигналдары) біріктіретін шағын құрылғы. Ол жануардың назарын аударып, тұрақты ассоциация қалыптастыруға көмектеседі. Жануар құрылғыны корпус қақпағын басу немесе қозғалыс датчигіне жақындау арқылы іске қоса алады. Осыдан кейін құрылғы алдын ала жазылған дауыстық хабарламаны ойнатады.
Құрылғы жадына белгілі бір қажеттіліктерге байланысты қысқа фразалар жазылады. Мысалы: «Мен тамақ жегім келеді» немесе «Маған сыртқа шығу керек». Жүйелі түрде үйреткенде, жануар белгілі бір әрекетті нақты нәтижемен байланыстырып, өз қажеттіліктерін білдіру құралына ие болады.
Дегенмен, мұқият қарасақ, сөйлеп тұрған бәрібір жануар емес, адам екені анық. Жануарлар тілін шынайы түсінуге әлі алыс болсақ та, технологиялар кем дегенде диалог иллюзиясына бір қадам жақындатуға мүмкіндік береді.
10. Иттің үруін бақылау жүйесі
Адам табиғаты қандай қарама-қайшы десеңізші: бір өнертабыстар үй жануарларымен «сөйлесуге» бағытталса, енді біреулері жануарды тыныштандыруды көздейді. Үруді бақылау жүйесі үй иттерін сабырлы үнсіздікке үйретуді ұсынады.
Құрылғы микрофонмен және сигнал өңдеу жүйесімен жабдықталған. Егер құрылғы иттің артық үруін анықтаса, автоматты түрде түзетуші әсер іске қосылады. Әдетте бұл қысқа жоғары жиілікті дыбыс немесе жануарға зиянсыз, бірақ жағымсыз әсер беретін басқа импульс болуы мүмкін. Мұндай жағдай қайталанған сайын итте үру мен жағымсыз сигнал арасында байланыс қалыптасып, нәтижесінде үру жиілігі біртіндеп азаяды деп уәде беруде жоба авторлары.
11. Үй жануарларына арналған телефон
Фото: fun-cats.ru
Бұл құрылғы кісінің өз үйіне қоңырау шалып, жануарымен сөйлесуіне мүмкіндік береді. Ішінде экран/видеодисплей, аудиобайланыс және камера бар. Сондықтан иесі құрылғыға кім келгенін және оның көңіл-күйін көре алады. Қосымша «жұбату» функциялары да бар. Құрылғы иесінің пәрмені бойынша тәттілер беріп, тіпті арнайы бөлік арқылы иесінің иісін де ұсына алады. Сонымен қатар жануардың табанымен басатын батырма қарастырылған. Теория жүзінде үйретілген мысық немесе ит өзі қоңырау шала алады. Бұл енді жай телефон емес, жануар да, адам да сағынған кезде көмектесетін тұтас моральдық қолдау станциясы іспетті.
Үй жануарларына арналған гаджеттер оларды бағу, күтім жасау тәсілдерін түбегейлі жаңартып жатыр. Жануарға қауіпсіздік пен тұрақтылық, иесіне – ыңғайлылық, екі жаққа да – байланыс мүмкіндігін сыйлайды.
Дайындаған: Б. ЕРМАН,
ТАҒЫ ДА ОҚЫҢЫЗ:
