2025 жылдың күзінде Берлинде T-HR3 роботтары өрт шыққан ғимараттарға сынақ ретінде жіберілді.
фотоколлаж: ЖИ
Бүгінгі күнде роботтар тек өндіріс цехтарында немесе зертханаларда ғана емес, біздің күнделікті өмірімізге де еніп келеді. Олар өнер көрсетеді, қоғамдық орындарда қызмет атқарады және тұрмыстық істерді жеңілдетеді.
Наурыз мерекесінде еліміздің бірнеше өңірінде биші роботтар өнер көрсетіп, көпшіліктің көңілін көтеруі де осының бір паршасы. Роботизацияның бұл жаңа кезеңі кейде қызықты, кейде күтпеген жағдайларға әкеледі.
1. Қытай: роботтар өнер сахнасында
2026 жылдың ақпанында Шанхайда роботтардың әлем бойынша алғашқы гала-концерті өтті. Бұл шараны Agibot компаниясы ұйымдастырды. Бір сағаттық шоуға 200-ден астам робот қатысты. Ол бүкіл әлемге тікелей көрсетілді.
Шой барысында роботтар би нөмірлерін орындап, подиумдарда жүріп, синхронды хореографиялық көріністер, комедиялық миниатюралар, музыкалық нөмірлер мен фокустар көрсетті.
Шоудың мақсаты – робот жүйелерінің лаборатория мен өндіріс ортасынан тыс мүмкіндіктерін көрсету. Сондай-ақ, бұл формат бірнеше роботтардың үйлесімді жұмысын, ұзақ уақыттық тұрақтылығын және олардың әлеуметтік және мәдени контекстегі рөлін зерттеуге мүмкіндік берді. AGIBOT Night оқиғасы роботтарды өнер арқылы адамдарға жақындатудың бірегей үлгісі болды.
2. Қытай: әйелді шошытқан робот жазаға тартылды
Наурыз айында Қытайда роботтарға қатысты тағы бір күтпеген жаңалық орын алды. Қытайдың Макао қаласында адамға ұқсайтын Unitree G1 модельді роботтың бір қылығы қоғамның назарын аударды. «70 жастағы әйел телефонға қарап келе жатқанда робот оған жол бермей тұрды, сол себепті әйел қорқып, стресске ұшырады» деп хабарланған. Әйел адам қатты шошып қалғандықтан, ауруханаға жеткізілді. Ал робот полиция қызметкерлері тарапынан «ұсталды».
Оқиға әлеуметтік желілерде тез таралып, көптеген пікірлерге себеп болды. Кейбір қолданушылар бұл жағдайды қызық көріп, әзілге айналдырса, енді біреулері роботтардың қоғамдық жерлерде қолданылуының қауіпсіздігі мен этикасына алаңдаушылық білдірді.
Бұл жағдай Қытайдағы роботтарды күнделікті өмірге енгізу процесінің кейде күтпеген сәттерге әкелетінін көрсетті. Мысалы, 2025 жылдың қарашасында Шэньчжэньде робот EngineAI T800 туристік аймақтарды күзетсе, Шанхайда «Сяо Ху» жол қозғалысын реттеді. Макаодағы оқиға роботтар мен адамдардың бірге өмір сүруіндегі әлеуметтік мәселелерді анықтады.
3. Роботтар тұрмыста: үй жұмыстарының жаңа көмекшілері
2026 жылдың ақпанында Сан-Францискодағы Weave Robotics стартапы үй шаруасына арналған Isaac 0 роботын шығарды. Бұл робот киімдерді бүктеуге маманданған. Пайдаланушы жуылған киімдердің топтамасын үстелге қояды, ал робот оны 30–90 минут ішінде бүктеп шығарады.
Isaac 0 футболкалар, шортылар мен ұзын жеңді жейделерді бүктегенде толық тәуелсіз жұмыс істей алады. Тек шалбар, іш киім және жастық қаптары, көлемі үлкен киім-бұйымдарды бүктеу кезінде оператордың қысқа араласуын қажет етеді.
Роботтың бағасы біржолғы төлеммен 7 999 доллар немесе ай сайын 450 доллар, қосымша депозит – 250 доллар. Қазіргі таңда алдын ала тапсырыс тек Сан-Франциско шығанағы тұрғындарына қолжетімді.
Бұл технология үйде күнделікті шаршаған жұмыстарды жеңілдетуге бағытталған роботтардың біздің тұрмысымызға еніп жатқанын көрсетеді.
4. Жапония: робот-психологтар қарттар үйлерінде
2025 жылдың соңында Токиода бірнеше қарттар үйінде Pepper роботтары психологиялық қолдау көрсету үшін енгізілді. Олар қарттармен әңгімелесіп, эмоцияларын бақылап, көңіл көтеретін ойындар өткізеді. Бұл тәжірибе қарттар арасындағы жалғыздық пен депрессияны азайтуға бағытталған. Ғалымдар роботтардың әлеуметтік эмоциялық интеллектін сынап көруде және алғашқы нәтижелер қуанарлықтай: қарттар роботтармен сөйлескеннен кейін көңіл-күйлері көтерілген.
5. Германия: робот-құтқарушылар өрт кезінде адамдарды эвакуациялайды
2025 жылдың күзінде Берлинде T-HR3 роботтары өрт шыққан ғимараттарға сынақ ретінде жіберілді. Олар қызыл түтінді зерттеп, адамдардың орналасқан жерін картаға түсіріп, қауіпті аймақтарды белгілейді. Бұл технология өрт сөндіру және апат кезінде адамның өмірін сақтауға арналған. Роботтардың автономды қозғалысы адамдарды эвакуациялауда үлкен көмек көрсететінін көрсетті.
6. Франция: робот-музыканттар опера сахнасында
Париждегі опера театрында бірнеше рет роботтар мен адам музыканттардың бірлескен концерттері өтті. Shimon және Ai-Da роботтары оркестрмен бірге музыка орындап, кейбір шығармаларды тіпті өздігінен «импровизациялады».
7. Оңтүстік Корея: робот-әскери жаттықтырушылар
Сеулде 2026 жылдың қаңтарында әскери оқу орталықтарында робот-тренерлер сынақтан өтті. Олар сарбаздардың физикалық жаттығуларын бақылайды, жарақат алу қаупін азайтады және тиімді жаттығу бағдарламаларын ұсынады. Бұл технология әскери дайындық сапасын арттыруға мүмкіндік береді.
Роботтар бүгінгі әлемде әртүрлі рөлдер атқарып, біздің өміріміздің ажырамас бөлігіне айналуда. Олар өнер мен мәдениетте шоу ұйымдастырады, қоғамдық өмірде кейде күтпеген жағдайларға себеп болып, әлеуметтік мәселелерді қозғайды, ал тұрмыста күнделікті жұмыстарды жеңілдетеді. Болашақта роботтармен қарым-қатынасымыздың сапасы олардың адам өміріне қосатын құндылығы мен қауіпсіздігіне байланысты болады. Біз роботтармен бірге өмір сүруге үйреніп, олардың әлеуетін тиімді пайдалана білсек, адамзат үшін бұл жаңа мүмкіндіктер дәуірін ашатын болады.
Дайындаған: Бауыржан ЕРМАН,
Тағы да оқыңыз:
Робот-терезе тазалағыш – көктемде ең керек гаджет
Арзан құлаққап іске арзи ма? Әлде қымбатын алмай, құлақтың құрышы қанбай ма?
