Алматыда көлдің жағасы өлі балықтармен толды

ERNUR.KZ. Алматы іргесіндегі Көкөзек су қоймасында балық қырылып жатыр. Шағын көлшіктің жағалауы кешелі бері өлі балыққа толып кеткен. Алайда су жәндіктерінің неден қырылғанын әзірге ешкім айта алмай отыр, деп хабарлайды ktk.kz.

Су тартылып, тізеден әзер асатын тоғанда балықтарға «ауа жетіспей қалды» деген болжам бар. Ал экологтар судан сынама алып зерттеуге кірісіп кетті.

Алматы маңындағы Көкөзек су қоймасы кешелі бері өлексе сасып кетті. Өйткені шағын көлшіктегі балық белгісіз себептен қырылып, жағалауға жиналып қалған. Алғашында әр жерден бір табылған өлекселерді тұрғындар байқапты. Бұрын-соңды мұндайды көрмеген олар көлшіктегі су деңгейінің күрт түсіп кеткенін айтады. Өйткені оған құятын Қарғалы өзенінің арнасы бітеліп қалған. Сондықтан саяз суда еркін жүзе алмаған балықтар тұншығып өлді деген болжам айтуда.

- Бұл көл бұрын мемлекет қарауында болды. Қазір жеке кәсіпкерлерге жалға берілген. Олар бітелген құбырды тазалауға ақша жұмсағысы келмейді. Өткенде сел жүріп, су арнасы жабылып қалды. Содан бері бұл көлге ешқандай ағын су келіп жатқан жоқ, - дейді Сергей Алексеев.

Деңгейі түсіп кетті. Шағын көл былтыр «Алтынкөл демалыс аймағы» деген серіктестікке сенімгерлік басқаруға берілген екен. Алайда бұл компанияның басшылары төбе көрсетпеді. Есесіне, таң атқалы балық қырылған аумақта төтенше жағдай мен әкімдік қызметкерлері жүр. Олар су бетінде самсап жатқан балықтарды жағалауға шығарып, санитарлық тазалық жүргіземіз дейді.

- Кешке дейін балықтар шығарылады. Тиісті жерге алып кетеді. Экологияға ешқандай қауіп төнбейді. Балықтың өлу себептері анықталуда. Оны тиісті құзіретті органдар анықтайды, - деді Қарасай ауданы әкімінің орынбасары Қанат Айманов.

Қазір көлдегі су деңгейі бір метрге де жетпейді. Сондықтан бұл көлшікте мүлде балық қалмады деуге әбден негіз бар. Ал өлген балықтардың біразы су түбіне шөгіп қалған.

Жағалауға жиналып қалған өлі балықтарды қолмен тазалап жатыр. Алайда шағын су қоймасында қанша балық қырылғаны әзірге белгісіз. Оны алдағы уақытта балық шаруашылығы қызметкерлері есептейді. Ал экологияға жауапты мамандар судың сынамасын зертханаға жіберген.