​Енді балалар мектепке жаңа тәртіп бойынша қабылданады

ERNUR.KZ. Жаңа тәртіп бойынша сыныптарды білім алушылардың даярлық деңгейі және даму дәрежесі бойынша жасақтауға рұқсат етілмейді, деп жазады sputniknews.kz.

Бұл туралы бастауыш, негізгі орта және жалпы орта білім оқу бағдарламаларын іске асыратын білім беру ұйымдарына оқуға қабылдаудың үлгілік ережелерінде жазылған.

Бұл ережелер білім және ғылым министрлігінің бұйырығымен 12 қазанда бекітілді.

Құжатқа сәйкес, сыныптарды білім алушылардың даярлық деңгейі және даму дәрежесі бойынша жасақтауға рұқсат етілмейді, ал оқушыларды қабылдау білім беру ұйымы басшысының бұйрығы негізінде жүргізіледі.

Бұдан бөлек, ерекше білім берілуіне қажеттілігі бар балаларды оқуға қабылдау баланың ата-анасының немесе өзге заңды өкілдерінің келісімімен педагогикалық-медициналық-психологиялық консультация қорытындысы ескеріле отырып жүзеге асырылады.

Ата-аналар баланың қалауын, жеке қабілетін ескере отырып, білім беру ұйымын таңдайды.

Сонымен қатар, білім беру ұйымына оқуға қабылдаудан бас тартылған жағдайда не істеу қажеттігі анықталған. Мұндай жағдайда баланың ата-анасы немесе өзге заңды өкілдері тұрғылықты жері бойынша білім басқармасына жүгінеді.

Тағы бір атап өтерлігі, балаларды мамандандырылған білім беру ұйымдары, гимназиялар мен лицейлерден басқа мектептерде бірінші сыныпқа қабылдау кезінде емтихандар, тестілеулер, сынақтар мен конкурстар жүргізілмейді.