Қытайлық компания Атырау облысында мұнай барлау жұмыстарын бастайды

03.04.2025 14:52

172

Жұмыстар Жылыой ауданында орналасқан Қызылқала және Дүйсеке-Кұлсары учаскелерінде жүргізілмек.

Фото: energy.s-kon.ru

ERNUR.KZ. "Астана" Халықаралық қаржы орталығында (АХҚО) тіркелген Kazakhstan FengYuanXinMao Energy Ltd жеке компаниясы Атырау облысында барлау бұрғылау жұмыстарын жүргізу жоспарын ұсынды, деп жазады inbusiness.kz.

Гонконгте тіркелген GLORY ROAD TRADING LIMITED иелігіндегі компания 2026–2029 жылдары келесі шараларды жүзеге асыруды жоспарлап отыр:

жалпы тереңдік нүктесі әдісімен (ЖТН) 500,55 км 2D-сейсмобарлау;
екі тәуелсіз іздеу ұңғымаларын бұрғылау (әрқайсысы 7 000 метр):
К-1 – Қызылқала учаскесінде;
ДК-1 – Дүйсеке-Кұлсары учаскесінде;
алғашқы жұмыстардың нәтижелеріне байланысты төрт тәуелді ұңғыма.

Бұрғылау нәтижесінде компания мұнай-газ қабаттарының құрамын бағалап, С1 және С2 санаттары бойынша қорларды анықтауды жоспарлап отыр.

Бұған дейін Kazakhstan FengYuanXinMao Energy Тасшығыл учаскесінде барлау жұмыстарын жүргізген болатын. Бұрғылау кезінде 5 873 метр тереңдікте газдың қарқынды көріністері тіркелді. Алайда, қабат қысымының жоғарылығына байланысты жұмыстар 6 295 метр тереңдікте тоқтатылды.

Сондай-ақ, Қарашүңгіл аумағында бұрғылау кезінде газоконденсат ағындары анықталған, бірақ компания ықтимал ресурстар туралы ресми деректерді әлі ұсынған жоқ.

Kazakhstan FengYuanXinMao Energy Ltd. 2024 жылдың 2 шілдесінде ҚР Энергетика министрлігімен Тасшығыл учаскесінде көмірсутектерді барлау және өндіру жөніндегі келісімшартқа қол қойды.