Жаңа оқу жылы қарсаңында «AMANAT» партиясы Шымкент қалалық филиалы жанындағы Әйелдер қанаты комиссиясы мен Shymkent City Mall сауда орталығының әкімшілігі бірлесіп, «Баланы мектепке дайындайық!» атты қайырымдылық акциясын өткізді.
Шара барысында балаларға кеңсе тауарларымен толықтырылған мектеп сөмкелері, мектеп формасы және қажетті жабдықтар берілді. Сонымен қатар балалар Play Park ойын-сауық алаңына тегін кіріп, Kinoplexx 9 City Mall кинотеатрында тегін фильм тамашалады. Балаларға тәтті тағамдар мен сусындар ұсынылып, мерекелік көңіл-күй сыйланды.
Акцияға қатысты пікір білдірген AMANAT партиясы Шымкент қалалық филиалының төрағасы Мұрат Жолдыхожаев әлеуметтік қолдау аясында жасалған игі істің маңызын атап өтті.
«Қазіргі таңда жүз елу балаға мектеп сөмкесі мен киімдері берілді. Бүгіннің өзінде елу балаға сый жасалды. Алдағы уақытта екі мың оқушыны қамту жоспарланған. Әлеуметтік осал топтағы, тұрмысы төмен отбасыларға арнайы сараптама жүргізіліп, соларға көмек бағытталды. Балаларға тек сөмке мен киім емес, кино көру, ойын-сауық орталығына бару, дәмді тағамдардан дәм тату мүмкіндігі де ұсынылды. Бұл – олардың көңілін көтеріп, жаңа оқу жылын шаттықпен бастауына жасалған қамқорлық», – деді ол.
Айта кетейік, «Баланы мектепке дайындайық!» акциясы дәстүрге айналған. Жыл сайын жаңа оқу жылы қарсаңында AMANAT партиясы депутаттар мен демеушілердің қолдауымен тұрмысы төмен отбасыларға көмек көрсетіп келеді.
