Мұндағы мақсат - тұрғындардың адам саудасының қауіптері туралы хабардарлығын арттырып, құқық бұзушылықтың алдын алу.
Шымкент қаласында полиция департаментінің ұйымдасқан қылмысқа қарсы күрес басқармасы қала әкімдігімен бірлесе отырып, адам саудасының алдын алуға бағытталған кешенді шараларды қолға алды. Бұл бастама қоғамдағы аса өзекті мәселелердің бірі – адам саудасына қарсы күресті күшейтіп, тұрғындарды сақтыққа шақыруды мақсат етеді.
Аталған шара аясында үкіметтік емес ұйымдардың қолдауымен дайындалған ақпараттық материалдар қаладағы халық көп шоғырланатын орындарға орналастырылды. Атап айтқанда, әуежайда, теміржол вокзалында, ірі автобекеттерде және қоғамдық көлік аялдамаларында арнайы стендтер мен баннерлер орнатылды. Бұл материалдар азаматтарға адам саудасының қауіптілігі, оның түрлері және одан қорғанудың жолдары туралы мәлімет береді.
Полиция қызметкерлері мен әкімдік өкілдері тұрғындармен тікелей кездесіп, ақпараттық парақшалар таратты. Түсіндіру жұмыстары барысында азаматтарға өз қауіпсіздігін сақтау жөнінде кеңестер беріліп, адам саудасының құрбаны болмаудың негізгі қағидалары түсіндірілді. Арнайы дайындалған жадынамаларда сенім телефондары мен хабарласуға болатын жедел желілердің нөмірлері көрсетілген. Бұл кез келген күдікті жағдай туындағанда немесе құқық бұзушылыққа тап болғанда азаматтардың жедел көмек алуына мүмкіндік береді.
Мамандардың айтуынша, адам саудасы тек қана еңбек немесе жыныстық қанаумен шектелмейді. Ол түрлі алдау жолдарымен жасалатын құлдықтың жаңа түрлерін қамтиды. Сол себепті халықтың құқықтық сауатын арттыру – мұндай қылмыстардың алдын алудың ең тиімді тетігі. Осы мақсатта іс-шара барысында азаматтарға нақты мысалдар келтіріліп, күдікті жағдайларды бірден құқық қорғау органдарына хабарлау қажеттігі ескертілді.
Жергілікті атқарушы органдар мен полиция департаментінің бірлескен жұмысы алдағы уақытта да жүйелі түрде жалғаса бермек. Ұйымдастырушылардың пікірінше, тұрғындардың белсенділігі мен хабардарлығы артқан сайын, адам саудасына қарсы күрес те нәтижелі бола түседі.
