Шымкент қаласында электр энергиясын тұтыну бойынша уақытша шектеулердің мән-жайы түсіндірілді

09.07.2025 17:19

Қала әкімдігі тұрғындардан аталған уақытша қолайсыздықтарға түсіністікпен қарап, қауіпсіздік шараларын сақтауды сұрайды.

2025 жылғы 4 шілдеде ауа райының күрт ысып, температураның жоғарылауына байланысты «KEGOC» аймақтық диспетчерлік орталығының нұсқауымен «ТЭЦ-3»-тің электр энергиясын өндіру көлемі 70 МВт-тан 0 МВт-қа дейін төмендеді. Осыған орай «Оңтүстік Жарық Транзит» ЖШС желілері арқылы электр энергиясын тұтынуға уақытша шектеу енгізілді.

Бұл туралы Шымкент қаласының Өңірлік коммуникациялар қызметі ақпарат алаңында өткен брифингте, Шымкент қаласы әкімдігінің ресми өкілі, қала әкімінің орынбасары – Сәрсен Абайұлы Құранбек кеңінен тарқатып айтып берді.

Аталған шектеулер нәтижесінде Шымкент қаласы бойынша электр энергиясын тұтыну 10 МВт көлемінде шектелді. Нақтырақ айтқанда, 2025 жылғы 4 шілде күні сағат 17:17 мен 19:12 аралығында Забадам, Лесхоз, Ақниет, Ынтымақ, Шұғыла, Игілік, Чапаевка, Тұрлан, Тельман және Оңтүстік шағын аудандарында электр энергиясы уақытша ажыратылды.

Сонымен қатар алдағы уақытта қала аумағында жоспарлы жөндеу жұмыстарының жүргізілуіне байланысты кейбір аудандарда электр энергиясы ішінара өшірілуі мүмкін.

• Тұран ауданындағы Қазығұрт шағын ауданында ГКТП-580,581 нысандарында 0,4 кВ әуе желісінің 3961 метрін және бағаналарды жаңарту жұмыстары жоспарланған.

• Абай ауданының Қайтпас шағын ауданында КТП-УВД және КТП-227 нысандарында 5849 метр әуе желісін және бағаналарды ауыстыру жұмыстары жүргізіледі.

• Әл-Фараби ауданы бойынша Тәуке хан көшесіндегі РП-17 нүктесінде 0,4 кВ жер асты кабелін жаңарту жұмыстары қолға алынған.

Қала әкімдігі тұрғындардан аталған уақытша қолайсыздықтарға түсіністікпен қарап, қауіпсіздік шараларын сақтауды сұрайды. Электрмен жабдықтау сапасын арттыру үшін алдағы уақытта да жаңғырту және жөндеу жұмыстары кезең-кезеңімен жүзеге асырылады.