Шымкент қаласында сібір жарасына байланысты эпидемиологиялық бақылау жүргізілуде

14.08.2025 16:51

105

Қоғамдық денсаулық сақтау және ветеринариялық қызметтер аурудың алдын алу бойынша бақылау жұмыстарын жалғастыруда.

Шымкент қаласы сібір жарасы ауруы бойынша қолайсыз аймақтардың бірі саналады. Аурудың табиғи ошақтары көршілес Түркістан облысы аумағында да кездесетіндіктен және тұрғындардың ауыл шаруашылық малдарымен тығыз байланыста болуы инфекцияның таралу қаупін арттырады.

2025 жылы қалада сібір жарасының зертханалық жолмен расталған үш жағдайы тіркелді. Ауруға шалдыққандардың бірі — 14 жастағы бала, екіншісі — жасөспірім, ал үшіншісі — ересек азамат. Олардың екеуі Шымкент қаласының тұрғыны болса, біреуі Түркістан облысы Бәйдібек ауданынан келген. Өткен жылы қалада мұндай жағдай тіркелмеген болатын.

Науқастар ауруды Түркістан облысында ауыл шаруашылық малдарын сою және өңдеу жұмыстарына қатысу барысында жұқтырған. Сойылған сиыр, қой және лақ етін бөліп, ішек-қарнын тазалау кезінде жұқпаға шалдыққан. Кейіннен олар Шымкентке келіп, медициналық көмекке жүгінген.

Науқастармен байланыста болған 15 адам медициналық бақылауға алынды. Қазіргі таңда олардың арасында сібір жарасына күдіктілер анықталған жоқ. Сонымен қатар, күдікті ет өнімдері арнайы белгіленген «Беккари» шұңқырына залалсыздандыру мақсатында тасталды.

Алдын алу шаралары аясында қалада эпидемиологиялық және ветеринарлық іс-шаралар жүргізілуде. Қауіпті топқа жататын 635 адамның 92,4%-ы (587 адам) сібір жарасына қарсы вакцинамен қамтылды.

Сібір жарасы (медицинада — күйдіргі) — Bacillus anthracis бактериясы арқылы таралатын зоонозды инфекциялық ауру. Бұл бактерия қоршаған ортада спора түрінде ұзақ уақыт сақталып, жоғары төзімділік көрсетеді.

Аурудың негізгі көзі — ірі қара, қой, ешкі, түйе, шошқа және жылқы сияқты үй жануарлары. Адамға ауру көбіне ауру малмен тікелей жанасу кезінде немесе ластанған ет, су және топырақ арқылы жұғады. Ауру адамнан адамға жұқпайды.

Мамандардың айтуынша, биылғы жаздың ерекше ыстық әрі құрғақ болуы жайылым жерлерде шөптің ерте қурауына себеп болған. Бұл жағдай малдардың ластанған топырақпен байланысын арттырып, инфекция жұқтыру қаупін күшейткен.

Шымкент қаласы аумағында сібір жарасы тіркелген стационарлық 8 нүкте бетон қоршаулармен белгіленіп, бақылауға алынған. Сонымен қатар, 9 мал қорымы да тиісті санитарлық талаптарға сай бақылауда тұр.

Тұрғындарға ұсынылатын сақтық шаралары:

• Белгісіз немесе ауру малдарды байқаған жағдайда ветеринар мамандарға хабарлау;

• Шикі етпен жұмыс істегенде қорғаныш құралдарын (қолғап, алжапқыш) қолдану;

• Жеке тұлғалардан мал өнімдерін сатып алмау, тек ветеринарлық бақылаудан өткен орындарды таңдау;

• Терідегі жаралар, бөртпелер немесе жалпы әлсіздік байқалған жағдайда дереу дәрігерге жүгіну;

• Мал көметін арнайы аймақтарда мал бағуға немесе егін шаруашылығымен айналысуға тыйым салынатыны ескертіледі.

Қоғамдық денсаулық сақтау және ветеринариялық қызметтер аурудың алдын алу бойынша бақылау жұмыстарын жалғастыруда. Мамандар тұрғындарды сақтық шараларын сақтауға және тексерілмеген мал өнімдерін пайдаланбауға шақырады.