ШЫМКЕНТ: халыққа жұмыспен қамтудың мемлекеттік бағдарламалары түсіндірілді

Шымкент қаласында халық көп шоғырланатын орындардың бірі – “Алаш” базарында Абай ауданының Мансап орталығы мен Жастар ресурстық орталығының мамандары тұрғындармен арнайы кездесу ұйымдастырды.

Мұндай шараның басты мақсаты – азаматтарға қолжетімді мемлекеттік қолдау бағдарламалары жайлы толыққанды ақпарат беру, олардың жұмысқа орналасуына көмектесу және еңбек нарығындағы белсенділігін арттыру.

Іс-шара барысында мамандар базарға келген қала тұрғындары мен саудагерлерге қазіргі таңда қолданыстағы бірнеше бағыт бойынша түсініктеме берді. Атап айтқанда, тұрақты жұмыс орындарына орналасу жолдары, субсидияланатын жұмыс орындары, қысқа мерзімді кәсіптік оқыту мүмкіндіктері, мемлекеттік қайтарымсыз гранттар алу тәртібі және өңіраралық қоныс аудару арқылы жаңа жұмыс орындарына қол жеткізу тетіктері жайлы кең көлемде мәлімет ұсынылды.

Мысалы, субсидияланатын жұмыс орындары бойынша азаматтарға белгілі бір мерзімге мемлекет тарапынан еңбекақысының бір бөлігі төленетінін, бұл жұмыс берушілер үшін де, жұмыс іздеушілер үшін де тиімді мүмкіндік екені түсіндірілді. Сондай-ақ қысқа мерзімді кәсіптік оқыту курстарының мамандық таңдау аясын кеңейтуге, жаңа кәсіби дағдыларды меңгеруге жол ашатыны айтылды. Мемлекеттік гранттар тақырыбы да ерекше қызығушылық тудырды – мамандар грантқа өтінім беру тәртібі, талаптары мен қажетті құжаттар тізімін егжей-тегжейлі түсіндірді.

Өңіраралық қоныс аудару мүмкіндігі туралы да ақпарат берілді. Бұл бағдарлама әсіресе тұрақты жұмыс табу қиын өңірлерден жаңа аймақтарға көшіп, жұмысқа орналасқысы келетін азаматтарға арналған. Мұндай қадам тұрғындарға жаңа өмір бастауға және әлеуметтік жағдайын жақсартуға мүмкіндік береді.

Кездесу барысында мамандар әрбір азаматтың сұрағына жеке-жеке жауап беріп, бағдарламаға қатысу шарттары мен талаптарын нақтылап жеткізді. Тұрғындар өздеріне қажетті ақпаратты алып қана қоймай, болашақта жұмысқа орналасу және кәсіпкерлікпен айналысу мүмкіндіктері жайлы жаңа мәліметтерге ие болды.

Іс-шара соңында қатысушылар мұндай кездесулердің маңыздылығын ерекше атап өтіп, ұйымдастырушыларға алғыстарын білдірді. Олар еңбек нарығында бағдар табуға, кәсіптік білім алуға және өз ісін бастауға септігін тигізетін осындай ақпараттық қолдау шараларының жиі өтіп тұрғанын құптайтынын жеткізді.