ШЫМКЕНТ: халықты жұмыспен қамту көрсеткіші пысықталды

Үш аптаға жуық уақыт ішінде атқарылған жұмыстардың сараптамасы еңбек нарығындағы белсенділіктің артып келе жатқанын және жұмыссыздық деңгейін төмендетуге бағытталған бірқатар тиімді шаралардың жүзеге асырылғанын көрсетті.

Есеп барысында ең жоғары нәтиже көрсеткен бағыт ретінде субсидияланатын жұмыс орындарына орналастыру бағыты аталды. 2025 жылдың осы кезеңінде аталған бағыт бойынша 4081 адам жұмысқа орналастырылды. Бұл көрсеткіш – мемлекет тарапынан көрсетілетін қолдаудың және жұмыс берушілермен бірлесіп атқарылып жатқан жүйелі жұмыстың нақты нәтижесі. Сонымен қатар, бұл дерек еңбек нарығын жандандыруға бағытталған бағдарламалардың тиімділігін және халықтың белсенді қатысуын айқындайды.

Осы кезеңдегі өзге көрсеткіштерге тоқталсақ, жастар практикасы бойынша оң өсім тіркелді. Егер есепті кезеңнің басында бағдарламаға 644 жас маман қатысып жүрген болса, шілденің соңына қарай бұл көрсеткіш 882 адамға жетті. Яғни, бар-жоғы 20 күннің ішінде 238 адамға артып отыр. Бұл – жұмыс тәжірибесі жоқ жастар үшін кәсіби ортаға бейімделуге және алғашқы еңбек дағдыларын қалыптастыруға үлкен мүмкіндік.

Алғашқы жұмыс орны бағдарламасы бойынша да айтарлықтай алға жылжу байқалды. Бағдарламаға қатысушылар саны 62 адамға көбейіп, жалпы 204 адам қамтылды. Бұл – жоғары оқу орындары мен колледж түлектерінің еңбек жолын бастауына ықпал ететін маңызды бағыттардың бірі.

Сонымен қатар, зейнет жасына жақындаған азаматтарды қолдауға арналған «Күміс жас» жобасы бойынша 38 адамға өсім байқалып, жалпы 416 адам тұрақты жұмысқа орналастырылды. Бұл жоба тәжірибелі мамандардың еңбекке араласуын жалғастыруына және өмірлік тәжірибесін жас буынға үйретуіне мүмкіндік береді.

Тұрақты жұмыс орындарына орналастыру көрсеткіші де оң нәтиже көрсетті. Есепті кезеңде бұл сан 6222 адамнан 6656 адамға жетіп, 434 адамға артты. Мұндай өсім тұрақты табыс көзін іздеген азаматтар үшін қолайлы жағдай жасалып жатқанын және жұмыс берушілердің белсенділігінің артқанын білдіреді.

Дегенмен, қаладағы барлық аудандарда көрсеткіштер бірдей деңгейде емес. Кейбір аудандарда жұмысқа орналастыру қарқыны төмен болып қалып отыр. Осыған байланысты, басқарма басшысы Жанат Өтебаева аудандық деңгейде жұмысты күшейту, көрсеткіштер арасындағы теңгерімді қамтамасыз ету, сондай-ақ инвестициялық жобаларды іске асыру бағытында қарқынды әрекет ету қажеттігін атап өтті.

Сонымен бірге, ол орталықтың жұмысын әрі қарай тиімді үйлестіру мақсатында жаңа басқару тетіктерін енгізуді тапсырды. Атап айтқанда, жұмысқа орналасу процесінде электронды келісімшарттарды кеңінен пайдалану және жұмыс берушілердің міндетті зейнетақы жарналарын уақытылы аударуын қатаң қадағалау міндеттелді. Бұл тәсілдер еңбек нарығының ашықтығын арттырып, әрбір жұмыс орнының ресми түрде рәсімделуін қамтамасыз етеді.

Жалпы алғанда, шілденің соңғы 20 күніндегі көрсеткіштер еңбекпен қамту жүйесінде оң өзгерістердің бар екенін және қабылданған бағдарламалардың нақты нәтиже беріп отырғанын айқын көрсетеді.