ШЫМКЕНТ: «Отбасын қолдау орталығы» қала тұрғындарымен кең көлемді қоғамдық кездесу өткізді

Шымкент қаласындағы «Отбасын қолдау орталығы» коммуналдық мемлекеттік мекемесінде қала тұрғындарымен кең көлемді қоғамдық кездесу өтті.

Мұндай кездесулердің басты мақсаты – халық пен мемлекеттік органдар арасындағы ашық диалог орнатып, әлеуметтік қолдау бағытындағы мемлекеттік саясатты кеңінен түсіндіру, сонымен қатар азаматтарды мазалап жүрген мәселелерді бірлесе талқылап, нақты шешу жолдарын қарастыру болып табылады.

Іс-шараға Шымкент қаласы Жұмыспен қамту және әлеуметтік қорғау басқармасының әлеуметтік көмек тағайындау және төлемдерін жүргізу бөлімінің басшысы Н.Байсан, Мүгедектігі бар азаматтармен және ардагерлермен жұмыс жөніндегі бөлімнің бас маманы Г.Нұржанова, «Әжелер» кеңесінің төрайымы К. Лаханқызы, сондай-ақ «Әділ Билер» республикалық қоғамдық бірлестігінің Шымкент қалалық филиалының төрағасы Н. Жанзақов қатысты. Әлеуметтік салаға тікелей қатысы бар мамандардың, тәжірибелі ардагерлер мен қоғамдық ұйым өкілдерінің бірлесе қатысуы кездесудің маңызын арттырып, тұрғындардың түрлі санаттағы сұрақтарына жан-жақты жауап беруге мүмкіндік берді.

Жиын барысында мемлекет тарапынан көрсетілетін әлеуметтік қолдаудың әртүрлі түрлері кеңінен түсіндірілді. Әсіресе аз қамтылған отбасыларға, көпбалалы аналарға, мүгедектігі бар азаматтарға және зейнеткерлерге берілетін жәрдемақылар мен әлеуметтік төлемдер жайында толыққанды ақпарат ұсынылды. Мамандар мемлекеттік қолдау шараларын рәсімдеу үшін қажетті құжаттар, өтініш беру тәртібі және тағайындау мерзімдері жөнінде тұрғындарға нақты мысалдар келтіріп түсіндіріп өтті.

Сонымен қатар, кездесуде әлеуметтік саладағы цифрландыру бағытына ерекше назар аударылды. Қатысушыларға министрліктің цифрлық платформасы негізінде жүзеге асырылып жатқан жаңа пилоттық жобаның скорингтік моделі таныстырылды. Бұл модель әлеуметтік қолдау мен мемлекеттік қызмет көрсету үдерісін жеңілдетіп, азаматтарға қызметтің қолжетімділігін арттыруға бағытталған. Жоба аясында білім беру, әлеуметтік қорғау, тұрғын үй қатынастары және дене шынықтыру салалары бойынша мемлекеттік қызметтерді онлайн түрде жылдам әрі ыңғайлы алуға мүмкіндік берілетіні айтылды. Мамандардың айтуынша, бұл жүйе бюрократиялық кедергілерді азайтып қана қоймай, әлеуметтік қолдауды әділ әрі ашық тағайындауға жол ашады.

Кездесу барысында тұрғындар тарапынан да бірқатар маңызды сұрақтар көтерілді. Азаматтар әлеуметтік төлемдердің уақытылы берілуі, ардагерлерді қолдау шаралары, мүмкіндігі шектеулі жандарға арналған инфрақұрылымның дамуы секілді өзекті мәселелерді ортаға салды. Қатысқан мамандар әрбір сұрақты мұқият тыңдап, түсінікті әрі жан-жақты жауап берді. Сонымен қатар, кейбір мәселелерді шешу үшін жеке қабылдаулар ұйымдастырылатыны айтылды.

«Әжелер» кеңесінің төрайымы К. Лаханқызы жастар тәрбиесіндегі отбасылық құндылықтардың маңызын ерекше атап өтіп, осындай кездесулердің қоғамдағы ауызбіршілікке ықпал ететінін жеткізді. Ал «Әділ Билер» бірлестігінің төрағасы Н. Жанзақов тұрғындар мен билік арасындағы ашық диалогтың дамуы әлеуметтік әділеттілікті нығайтып, азаматтардың сенімін арттыратынын айтты.

Қорытындысында, бұл қоғамдық кездесу әлеуметтік қолдау саласындағы мемлекеттік бастамаларды халыққа кеңінен таныстырумен қатар, тұрғындардың пікірін тыңдауға, нақты проблемаларды анықтауға және шешу жолдарын бірлесіп қарастыруға мүмкіндік берді. Мұндай шаралар әлеуметтік саладағы ашықтық пен қолжетімділікті арттырып қана қоймай, қала тұрғындарының мемлекеттік саясатқа деген сенімін нығайтуға айтарлықтай үлес қосатыны сөзсіз.