Кездесуге ауданның белсенді тұрғындары, ардагерлер, қоғам қайраткерлері мен жастар қатысты.
Қазақстан Республикасы Парламенті Сенатының депутаттары Нұрлан Бекназаров пен Айгүл Қапбарова Шымкент қаласының Абай ауданы тұрғындарымен кездесу өткізді.
Іс-шараның басты мақсаты – қабылданған заңнамалық актілердің мазмұнын түсіндіру және жергілікті инфрақұрылым мәселелерін талқылау болды.
Тұрғындар жолдардың сапасыздығы, көше жарығының жеткіліксіздігі, санитариялық жағдайдың көңіл көншітпейтіні сияқты мәселелерді алға тартты. Сонымен қатар, спорт нысандарының жетіспеушілігі, жұмыссыздық, жер телімдерін бөлу барысындағы түйткілдер, сондай-ақ заңсыз құрылыс нысандарының көбеюі мәселелері кеңінен сөз болды.
Сенатор Нұрлан Бекназаров кездесуде:
«Халық көтерген әрбір мәселе біздің назарымызда. Біздің міндетіміз – тек заң қабылдау ғана емес, сол заңдардың орындалуын қадағалау. Азаматтардың нақты сұрақтарына нақты жауап беру – басты басымдық», – деп атап өтті.
Кездесуді ұйымдастырушылар тұрғындардан түскен барлық ұсыныс пен өтініштер тиісті мемлекеттік органдарға жолданып, оларды шешу бағытында тиісті жұмыстар жүргізілетінін жеткізді.
![](/assets/thumbnails/76/76dd111bcca168fd023efa94efa06de1.jpg ""Бірдеңе жеу үшін менен рұқсат сұрайды" - келіншек күйеуінің қылығын айтып берді")
