Шымкентте мұсылман әйелдерінің киім байқауы өтті

Шымкент қаласында Қазақстан мұсылмандары діни басқармасының бастамасымен еліміздегі ерекше мәдени-рухани жобалардың бірі – «Әсем киім – әйел ажары» республикалық сән байқауының аймақтық іріктеу кезеңі өтті. Бұл шараны ҚМДБ-ның Шымкент қаласы бойынша әйел-қыздар секторы ұйымдастырды.

Байқаудың басты мақсаты – мұсылман әйелдерінің киім кию мәдениетін насихаттау, оны шариғат талаптарына сай және ұлттық ерекшеліктермен үйлестіре отырып, заманауи өмір салтына бейімдеу. Сонымен қатар, сән әлемінде артық жылтыр мен салтанаттан гөрі күнделікті тұрмысқа ыңғайлы, кеңсе жұмысына қолайлы әрі спорттық белсенділікке бейімделген жинақы үлгілерді қоғамға таныстыру көзделді.

Сән көрсетілімінде киім үлгілерінің түрлі бағыттары ұсынылды. Әр қатысушы қазақы нақышты сақтай отырып, заман талабына сай жаңа стиль қалыптастыруға тырысты. Бұл жерде тек сәнді ғана емес, сонымен бірге қарапайымдылықты, ұстамдылықты және әйел затына тән әдемілікті дәріптеу басты назарда болды. Көрсетілген топтамалар арасында жұмыс барысында, күнделікті өмірде және спорттық іс-шараларда киюге ыңғайлы үлгілер ерекше қолдау тапты.

Іріктеу кезеңіне түрлі салада еңбек етіп жүрген қыз-келіншектер қатысты. Олардың арасында ұстаздар, дәрігерлер, шығармашылықпен айналысатын мамандар және жас кәсіпкерлер болды. Әрқайсысы өздері дайындаған образдарын көпшілікке ұсынды. Осы арқылы қатысушылар сәнді киім тек кәсіби дизайнерлердің ғана емес, қарапайым қыз-келіншектердің де шығармашылық ізденістерінің жемісі екенін көрсетті.

ҚМДБ әйел-қыздар секторының жетекшісі Балжан Асылханқызы байқаудың мән-маңызына тоқталып:
«Бұл байқаудың басты мұраты – сән қуудың шегін шариғат талаптарымен үйлестіру. Біз ислам қағидаттарын ұлттық болмыспен байланыстыра отырып, мұсылман әйелдерінің киім үлгісін жаңа деңгейге шығаруды көздеп отырмыз. Ұлттық құндылықтарды дәріптеу арқылы қазіргі заманғы киім үлгілерін үйлестірсек, жас ұрпаққа жақсы өнеге болады деп сенеміз», – деді.

Ұйымдастырушылардың мәліметінше, байқаудың іріктеу кезеңдері еліміздің барлық өңірлерінде өткізіліп жатыр. Әр өңірден үздік деп танылған топтамалар республикалық деңгейде Алматы қаласында өтетін финалдық кезеңде ұсынылады. Шымкенттегі іріктеу барысында жеңімпаз атанған дизайнер өз өңірінің намысын қорғайтын болады.

Бұл бастама алдағы уақытта мұсылман әйелдеріне арналған отандық сән индустриясын дамытуға, жастардың шығармашылық қабілеттерін шыңдауға және киім үлгісінде ұлттық болмыс пен рухани құндылықтарды сақтауға үлкен үлес қосады деп күтілуде.

«Әсем киім – әйел ажары» байқауы – жай сән көрсетілімі ғана емес, ұлттық мәдениет пен шариғат талаптарын үйлестіре отырып, қоғамға жаңа құндылықтар ұсынатын маңызды жоба. Шымкент қаласында өткен іріктеу кезеңі осының айқын дәлелі болды.