Әйел баласын ұрлап кеткендерді мотоциклмен қуып, оны құтқарып қалды

ERNUR.KZ. Таиландтың Бурирам провинциясында тұратын 38 жастағы Сутия ұлын ұрламақ болған қаскөйлердің соңынан мотоциклмен қуып, оны құтқарып қалды, деп жазады Stan.kz.

Сутияның 19 жастағы ұлы – аутизм спектрі бұзылысы бар, бірақ ол өз бетінше өмір сүріп, мобильді телефондар мен басқа да электрониканы жөндеуді жақсы меңгерген. Бір күні оған айына 20 мың бат (шамамен 50 мың теңге) жалақы төлейтін жұмыс ұсынылғаны туралы хабар келеді. Анасы бірден күдіктеніп, ұлын бұл ұсыныстан бас тартуға көндіреді.

Алайда бірнеше күн өткен соң ұлы анасына Сакэу провинциясына жұмысқа кететінін хабарлап, кенеттен байланыс үзіледі. Сутия үйіне жүгіріп келіп, ұлының қара түсті көлікке отырып жатқанын көреді. Ол бірден мотоцикліне мініп, ұрлықшылардың соңынан қуады.

Көлік аялдаған кезде Сутия өзін ұлдың анасы екенін айтып, қаскөйлерден түсініктеме талап етеді. Ол жолға шығар алдында полицияға хабар берген еді. Сол сәтте полицейлер Сутияға қайта қоңырау шалып, жағдайды нақтылауға тырысады. Бұны естіген ұрлықшылар жігітті босатып, қашып кетеді.

Кейін анасы баласының телефонынан қаскөйлермен хат-хабар алмасуын тапты. Белгісіз әйел әйелдің баласын өз компаниясында әкімшілік қызмет атқаратынына сендірген. Бірақ Сутияның ойынша, баласын телефон арқылы алаяқтыққа итермелеу немесе заңсыз қаржы операцияларына қатыстыру жоспарланған.