Сирияның уақытша президенті жарияланды

ERNUR.KZ. Сирияның қазіргі көшбасшысы әрі "Хайят Тахрир аш-Шам" (ХТШ) тобының басшысы Ахмет әл-Шара ресми түрде өтпелі кезеңде ел президенті болып тағайындалды, деп жазады ulysmedia.kz.

Ол мемлекетті "өтпелі кезең үкіметі" кезінде басқарады, деп хабарлайды "Әл-Арабия" телеарнасы және басқа да Таяу Шығыс БАҚ.

Әл-Шара Сирияның атынан шетелде сөз сөйлейді.

Сирия президенті міндетін атқарып, халықаралық форумдарға шығады. Ахмед әл-Шара өтпелі кезеңде ел президенті қызметіне кірісетіні туралы хабарлаймыз, - деген Сирияның әскери операциялар басқармасының хабарламасын ТАСС-қа келтіреді.

Әл-Шараның айтуынша, "өтпелі кезеңнен" кейін сайлау өткізіліп, Сирияның тұрақты үкіметі құрылады. "Өтпелі кезеңнің" қанша уақытқа созылатыны белгісіз.

Сонымен қатар, Әл-Шара жаңа конституция қабылданғанға дейін әрекет ететін уақытша заң шығару кеңесін құрады, деп хабарлайды SANA агенттігі.

Батыс елдері мен Ресейде террористік деп танылған "Хайят Тахрир аш-Шам" тобы және оның қарулы оппозиция қатарындағы одақтастары қарашаның аяғынан 7 желтоқсанға дейін Сирияның солтүстігінен Дамаскке дейін көтеріліп, президент Башар Асадтың режимін құлатып, елдегі билікті басып алған.

Әскер мен қауіпсіздік күштері оларға ешқандай қарсылық көрсетпеді. Асад елден кетіп, Ресейден саяси баспана алды.

ҚАЗАҚСТАН СИРИЯНЫҢ ЖАҢА БИЛІГІМЕН БАЙЛАНЫС ОРНАТА МА

Қазақстан билігі Сирияның жаңа билігімен байланыс орната ма? Жалпы Сирияда қазір Қазақстанның қанша азаматы жүр? Бұл сұрақ бүгін мәжіліс кулуарында Қазақстан сыртқы істер министрінің орынбасары Әлібек Бақаевқа қойылған. Бақаевтың айтуынша, Сирия билігіне келген топ Қазақстанның тыйым салынған ұйымдар тізімінде жоқ. Тәліптермен байланыс орнатқандай Қазақстан да олармен қарым-қатынасты реттей ме деген сұраққа Бақаев “ол БҰҰ шешіміне байланысты” деп жауап берді.