Жапония үкіметі бастапқыда J-Alert-ке Солтүстік Корея ұшырған алғашқы зымыран Хонсю аралының үстінен ұшатыны туралы ескерту жасады.
ERNUR.KZ. Жапония үкіметі бейсенбі күні таңертең Солтүстік Корея шығыс бағытта үш зымыран ұшырып, олардың бірі құрлықаралық баллистикалық зымыран болуы мүмкін деп мәлімдеді, деп жазады ҚазАқпарат.
Жапония үкіметі бастапқыда J-Alert-ке Солтүстік Корея ұшырған алғашқы зымыран Хонсю аралының үстінен ұшатыны туралы ескерту жасады, бірақ кейінірек ол снаряд Жапон теңізінің үстіндегі радардан жоғалып кеткенін хабарлады.
Сыртқы істер сарапшыларының айтуынша, Солтүстік Кореяның соңғы ұшырған зымыраны АҚШ пен Оңтүстік Кореяның бес жыл ішіндегі алғашқы ауқымды бірлескен әуе жаттығуларына жауап болуы мүмкін.
Бейсенбіде Жапония премьер-министрі Фумио Кисида Солтүстік Кореяның бірнеше рет зымыран ұшыруын «варварлық және миға сыймайтын әрекет» деп айыптады.
Оңтүстік Корея әскерилері Пхеньянның Сунан ауданынан таңғы сағат 7:40 шамасында ұзақ қашықтықтағы баллистикалық зымыран, содан кейін таңғы 8:39 шамасында Оңтүстік Пхеньян провинциясынан шығысқа қарай екі қысқа қашықтықтағы зымыран ұшырылғанын мәлімдеді.
