Аймағамбетов: Кейбір мектеп директорлары 5 жылдан бері аттестациядан өтпеген

ҚР Оқу-ағарту министрі Асхат Аймағамбетов, Түркістан облысына жұмыс сапарымен келді, деп хабарлайды ERNUR.KZ.

Бұл туралы министр facebook парақшасында жазды.

Таңертеңнен бері облыстың бірнеше мектебін аралап үлгерген министр кейбір мектеп басшыларының жұмысын төмен деп бағалағанын айтады.

"Таңертеннен бері Түркістан облысындағы алты ауылға барып, жеті мектептің жұмысымен таныстым. Соның ішіндегі екі мектеп басшысының жұмысына төмен баға беруге болады. Өз құзыреттеріндегі міндеттерін орындауына және қажетті жұмысты ұйымдастыруларына қатысты сұрақтар бар. Сондай-ақ мектептердің біріндегі кітапханашыға «Оқуға құштар мектеп» жобасы бойынша атқарып жатқан жұмысы үшін алғысымды айттым. Тағы екі мектепте осы жоба бойынша жұмыс тиісті деңгейде орындалып отырған жоқ. Мектеп басшыларының аттестациядан өту мерзімі өтіп кетсе де, кейбір облыс аудандарында 5 жылдан астам уақыт бойы аттестация өткізілмеген. Осы облыстың басқа да білім беру ұйымдарының жұмысымен танысамын", - деп жазды Асхат Аймағамбетов.