Алимент өндіре алмай жүргендерге 1 млн теңгеге дейін ақша беріледі

ERNUR.KZ. Әділет министрі Марат Бекетаев «Алимент төлеу қорына» қаражат жиналып жатқанын мәлім етті, деп жазады ҚазАқпарат.

«Алимент төлеу қоры» атты жеке сот орындаушылардың республикалық палатасының жанынан арнайы әлеуметтік қор құрылды. Қазіргі таңда тұрақты жұмысын қамтамасыз ету үшін осы қорға қаражат жинау кезеңі өтіп жатыр. Бұл ақшаны таратпас бұрын оны алдымен жинап алайық деп отырмыз», - деді Марат Бекетаевқа ОКҚ-да өткен баспасөз мәслихатында.

Министрдің айтуынша, қорға жиналған қаражат арнайы тәртіппен таратылады.

«Алимент алуы тиіс азаматтардың бәріне бірдей ақша беру мүмкін емес екенін бірден айтайын. Себебі ақша бәрінің қажеттілігін өтеуге бәрібір жетпейді. Сыйлы әрі абыройлы адамдардан тұратын арнайы комиссия құрылды. Оны бұрынғы сенатор Серік Байсейітұлы Ақылбай басқарады. Оның құрамындағы мүшелердің тізімін жеке сот орындаушылардың республикалық палатасының сайтынан көре аласыз. Нақты сол адамдар кімге қандай көмек берілетіні туралы шешім қабылдайды. Қаражат тек мұқтаж азаматтарға беріледі», - деді ол.

Оның сөзінше, бір адамға 1 миллион теңгеден артық берілмейді.

«Нақты шешімді қорға қаражат жинау жұмысы аяқталғаннан кейін қабылдаймыз», - деді Марат Бекетаев.