Алматыда қаржы пирамидасының екі директоры ұсталды

17.01.2021 09:06

2 265

Қазіргі уақытта 26 және 30 жастағы екі ер адам уақытша ұстау абақтысында қамауда отыр.

"QI-Trade Kazakhstan" қаржы пирамидасының екі директоры ұсталды, деп хабарлайды ERNUR.KZ Polisia.kz-ке сілтеме жасап.

Алматы полиция департаменті тергеу басқармасының мәліметінше, 1990 және 1994 жылы туған ер адамдар ұсталып, уақытша ұстау изоляторына қамалған. Бір күн бұрын сот "қамауға алу" түріндегі бұлтартпау шарасын санкциялады.

Полиция ЖШС-нің бас директоры – 1994 жылы туған жігітке халықаралық іздеу салынғанын еске салды.

Қазіргі уақытта оның жүрген жерін анықтап, ұстауға бағытталған жедел іздестіру іс-шаралары жүргізіліп жатыр.

"Компанияның шоттарына шектеу қойылды. Қазіргі таңда тергеуге жәбірленушілер мен осы ЖШС-нің басқа қызметкерлері қатысып жатыр", – деді полиция департаменті бастығының орынбасары Рүстем Әбдірахманов.

Еске сала кетейік, өткен айда "QI-Trade Kazakhstan" инвестициялық компаниясының мыңдаған салымшысы алаяқтарға алданғанын мәлімдеді. Олар ақшасын айына 3-8 проценттік өсіммен салған. Ал компанияның бас директоры төрт миллиард теңгемен қашып кетті деген болжам бар.